江若琳貪靚新娘今年唔造人
「生煎包王」蕭潤邦（Oscar）未婚妻江若琳（Elanne）主理的麵館昨日開張，Oscar不諱言想造人好好慶祝，即被Elanne喝止「今年唔生」，想大日子靚足一日！
人前人後都非常愛錫未婚妻的Oscar，打本逾百萬給Elanne的麵館昨日開張，獲李家鼎、王灝兒（JW）及男友葉韋彤（Tarzan）、HotCha、吳日言及老公等多位圈中好友撐場，人潮塞爆小店！
儀式完畢後，兩人接受訪問，Elanne感動表示在招牌亮燈儀式時差點落淚，幸有Oscar錫錫呵番！記者恭喜兩人的首個「BB」出世，問到今年會否生真BB，Oscar打趣說：「今日就生啦！要好好慶祝！」Elanne即搶答：「今年唔生住，結婚嗰日要靚一日！」提到店內掛有Elanne爺爺親自寫的字畫，她坦言大為感動：「爺爺都80幾歲，眼又矇、手又震都幫我寫，爸爸仲專登由廈門帶返嚟。」又指閒時會落舖親手沖飲品，並預告半年內開分店。
JW聞男友胳肋底好香
同場JW與男友Tarzan前後腳入餐廳，當被要求合照時，Tarzan搞笑與Yan「錯配」影相，懶理女友。談到早前拍拖現身商場，JW「硬食」男友胳肋底，她冧笑說：「佢胳肋底好香，拍拖都係咁（口架）啦！好正常，我又細粒喎！」講到前老闆黎明剛榮升爸爸，JW戥對方開心：「不過未搵佢，佢嘅BB一定好靚，最緊要健康！」吳日言則表示與Oscar相識多年，講到好友於年底行婚禮，她笑言可能會做兄弟：「佢依家應該忙緊開店，到時先再諗。」
文：音樂組
攝：鄭家俊