松松周身藥陳煒封衞生大使
陳煒與陳松伶（松松）合作拍劇，一見如故，松松拍攝以來受敏感困擾，被陳煒取笑周身藥，更獲封為「衞生大使」！而黃智賢則笑謂：「叫松松多啲返嚟TVB拍劇，就會有抗體。」
藝人陳煒、陳松伶及黃智賢（Ben）現時忙拍無綫新劇《危城 First Lady》，眾演員合作愉快，日前更齊齊於錄影廠的主景內拍攝Opening戲份。眾人以歌舞劇打扮上陣，Ben打晒煲呔型格登場，而着紅色西班牙舞衣的松松格外風騷，單起腳瞇眼擺甫士，相當搞鬼。穿起民初服的陳煒，無論眼神定甫士都甚有大姐Feel！
眼睛發炎又生疹
兩女首次合作，松松坦言拍攝得十分開心，更與陳煒上演「姊妹戲」：「我做陳煒家姐，比較西化，所以着洋裝，而陳煒就係比較傳統嘅女人，有親情線好過有感情線！」松松指拍攝以來都慘受敏感症困擾，皆因拍攝場地又熱又大塵，令她皮膚敏感痕癢難當：「又生疹，又畀蚊咬，隻眼又發炎，依家帶定晒啲藥同藥水開工！」笑指今次拍劇不算太辛苦，只是年紀大抵抗力變差！陳煒則表示與松松一見如故，取笑對方成了「衞生大使」，皆因清潔用品與藥物都一應俱全！
黃智賢長駐TVB有抗體
至於戲內夾在兩女中間的Ben，坦言戲中要與松松及陳煒跳舞，他打趣說：「我都係TVB廿一期舞蹈訓練班出道。」提到松松被蚊咬又敏感，他抵死說：「我又冇事，我渾身都係TVB嘅血，咁松松要多啲返嚟拍劇，咁就好似我咁有抗體。」
文：影視組