現年41歲的美國著名男歌手Robin Thicke的23歲索模女友April Love Geary，兩個月前為他誕下一女Mia，出名愛晒身材的她日前於社交網公開露點餵人奶照，被女主持Chanelle Hayes狠批，April即上載對方的賣肉照還擊，鬧對方虛偽！
April不時於Instagram開心Share性感照，近日上載由Robin操刀拍下她餵人奶的溫馨一幕，並留言：「MOM照片由BB老竇影低！」照片中April露乳餵人奶，雖然不少粉絲留言讚照片又靚又Warm，但亦有人批評不雅，英國電視女主持Chanelle Hayes更於另一社交網Twitter點名批評：「我全力支持餵人奶同選擇點樣餵你嘅BB，但點解有人覺得有需要將餵人奶照片甫上網？尤其係Robin Thicke女友嘅新照片！佢Set好頭化晒妝，露兩個胸，好奇怪囉，有冇需要咁做？」
April得悉後即反擊，分享Chanelle半裸的照片，並留言：「或者下次你想批評我放自己餵人奶照時，你應該真係好好咁望吓你自己影嘅相。唔係話拍裸照有錯，赤裸身體係美麗嘅事，但就唔好成為一個虛偽嘅阿媽囉。」後來再補充：「如果你見到女人上載餵人奶照而感到奇怪，咁你需要成長……都只係胸部啫！冷靜啲啦你哋！」
Robin於2015年與影星保娜柏頓（Paula Patton）離婚後，撻着比他年輕18年的April，今年2月生下愛女Mia，Robin亦與柏娜育有8歲兒子Julian。
文：外娛組