曾志偉食齋都醉瞓車迎65歲
藝人曾志偉昨日65歲生日，逢飲必醉的他預告於生日派對要不醉無歸，又指請來了不少音樂人夾band，預計會嘈到拆天，更笑言因此今年一改慣例，與同日生日的黃杏秀「拆夥」慶祝。
昨日是曾志偉65歲生日，一如以往於生日前夕設齋宴籌款，昨日就跟一班波友踢波，晚上再與演藝人協會的老友開派對狂歡，出席賓客包括洪天明一家、薛凱琪、陳小春、謝天華、C君、陸永等，不過跟志偉同月同日生日的黃杏秀，今年未有按慣例孖住慶祝，而是與老公阿叻陳百祥約埋王晶、彭健新、吳國敬及一班圈外朋友飯局。
志偉表示，生日齋宴已經做了十幾年，由以往打電話叫人畀錢買枱支持，到現在朋友會主動致電給他，今次筵開六十圍，預計籌得四、五百萬。
Band友同賀嘈到拆天
他笑言齋宴的朋友較靜，昨日派對的朋友較嘈：「今年演藝人協會加入咗好多音樂人，所以請咗新嘅音樂人嚟夾吓Band玩吓，古天樂做會長，佢好注重音樂上嘅支持，所以今晚預料會好嘈，以往就同黃杏秀一齊慶祝，今年分開，因為佢唔可以好嘈。（你會唔會上台夾Band﹖）唔會，我唔夠佢哋嘈。」他笑言要不醉無歸，但自爆前晚在齋宴已經飲醉：「我喺車度瞓着咗，今朝擘大眼都唔知自己喺邊。」
至於家人已提早幾日慶祝，問到兒子送甚麼禮物，志偉說：「飛吻同擁抱，一句問候，已經好好。」問到志偉生日月期間預計要食幾多餐慶祝？他開玩笑說：「好多餐，真係食到糖尿病，已經切咗三個蛋糕。」談到願望，志偉希望大家開心及身體健康，拍到令大家開心的電影，問他會否再拍遊戲節目獎門人？他坦言不會再做，但會開拍類似的節目：「6月就開。（咩班底？）都係嗰啲，會有啲舊人又會有新人。」
薛凱琪「高」人一等
而薛凱琪以吊帶裝晒肩兼腳踏7吋高跟鞋現身，表示提早到場綵排獻唱娛賓，並笑說：「睇吓搵唔搵到志偉上台跳舞啦！（趁佢未醉？）係等佢醉咗先，咁先好玩，或者佢嘅舞姿會好狂野。」而李若彤表示有參與志偉的齋宴，並幫手拍賣：「我將一條原本底價18萬嘅珠鏈叫到108萬成交，當將呢份心意送咗畀佢喇。」提到志偉想開拍些「開心戲」，她即謂隨時候命。
前晚同樣有去齋宴的藝人陳瀅透露，封利是當禮物，又指與一班合演《女人俱樂部》的演員敍舊：「坐埋一枱，好開心，好耐冇見班姊妹，尤其飾成年版嗰班演員，今次可以聚首一堂。（想開續集？）都想。」
文：影視組