馮盈盈隊酒醉爆被抬走

馮盈盈在《果》劇中有一場醉酒戲，為求逼真，事前要連隊兩罐啤酒，結果醉到在廠內走來走去，最終要由家人抬上保母車走人。她前晚在《果》劇結局飯局中受訪時說：「我戲屎，唔飲唔似醉，點知拍完之後全個劇組都知！依家拍緊《白色強人》，馬國明都笑住問我係咪拍戲畀人抬走嗰個。」問到是否叫定醫生男友接載？她一臉冧樣說：「都好嘅！（叫男友咪唔使叫家人接囉！）其實我講嗰晚接我嘅家人就係男友，我已經當咗佢係，佢都知今晚地點，我喺清醒時候通知咗佢，同埋帶定咗支特別啤酒畀李天翔，佢唔嚟嘅話我惟有自隊。」

岑麗香諗點玩新郎

而正忙於趕新劇的陳煒未能換裝便赴會，故以新劇的古裝造型亮相。對於盈盈酒量差一事，她說：「終於爆咗出嚟？全部人都笑佢，其實佢係真性情女仔，進取同主動，第一次拍劇就咁多笑料，拍一場反枱戲，試戲時佢真係反，搞到成枱嘢未拍就爛晒，好在公司規定爛乜嘢都係賠300蚊。」

香香笑言也有聽聞：「拍嗰時大家都知！（邊個見你醉樣最多？）女仔朋友多，如果今晚醉，我都係想得老公見到，因為佢結婚時應承咗點都錫我。」談到好姊妹苟芸慧被拍到與未婚夫睇婚禮場地，問到有否給意見？香香說：「香港場地我冇乜經驗。（點玩新郎？）要開始諗。（鍾嘉欣會去嗎？）要問佢，我哋到齊會完美啲！（幫頂酒？）聽聞苟苟好飲得！」

文：影視組