G.E.M.無底撐舊愛男友緊張監場
「宇宙巨漿」G.E.M.（鄧紫棋）前晚為緋聞舊愛華晨宇於《歌手2018》做幫唱嘉賓，華晨宇親做「柴可夫」到機場迎接她之餘，兩人綵排時更喁喁細語，又以黑色情侶裝襯到絕上陣。G.E.M.更激罕疑真空無底晒「肉」腿，難怪現任男友Mark緊張得「人肉速遞」，飛到長沙親自監場(目及)實女友。
「小巨肺」G.E.M.於2014年憑內地歌唱節目第二季《歌手》（前名：我是歌手）而爆紅，前晚G.E.M.以幫唱嘉賓身份亮相《歌手2018》，為前緋聞男友華晨宇（花花）坐鎮。甚少露「肉」腿的G.E.M.，更疑冇着底褲真空上陣，穿上一襲超性感高衩長裙，以招牌翹手動作孖住出場。據知G.E.M.現任造型師男友Mark，知道女友要情深款款與舊愛同台合唱情歌，即醋意大發，實行人肉貼身隨行兼監場。
化身「柴可夫」接機
G.E.M.與內地歌手華晨宇在2016年初，被目睹在深圳一個樂園翹手遊玩，隨即被爆原來早在2015年底秘密撻着，但雙方經理人都不想兩人公開情侶關係，所以一直玩「地下情」，不過其後迅速閃「分」。而G.E.M.與Mark的戀情始於2017年4月，當時兩人在日本街頭拖手斷正，雖然G.E.M.初時不認拍拖，但近年與阿Mark就愈愛愈高調，有影皆雙。Mark既是G.E.M.男友也是其造型師，在公在私都合作無間。
其實早在比賽前，華晨宇就已化身「柴可夫」專程到長沙機場接G.E.M.機，並把握時間綵排練歌。G.E.M.大讚對方：「佢進入狀態後，就好似發光嘅太陽。」雖然相識多年，但兩人一直鮮有同台合作，能夠促成今次「世紀合唱」皆因他們不時為音樂交流意見，G.E.M.表示：「其實佢無論之前喺其他電視節目，定係今次上《歌手》，好多歌曲都會事先發畀我聽，交流意見，所以合作都係好自然發生嘅。」
相隔四年返「娘家」
前晚是《歌手2018》總決賽的大日子，G.E.M.事隔四年以幫唱嘉賓身份再踏足同一舞台，力撐華晨宇與Jessie J、汪峰、張韶涵等爭奪今屆「歌王」寶座。兩人合唱改編版的《光年之外》，G.E.M.唱出招牌高音，華晨宇則大晒拿手Rap功，最終成功贏得本屆亞軍。賽後，G.E.M.坦言心情興奮，有一種回「娘家」的感覺，對於首次擔任幫唱嘉賓，她說：「雖然冇壓力，但都有啲啲緊張，不過更多的是興奮！」問到她是否冇着底褲真空上陣？她以短訊回覆：「很安全啦，不要問那麼仔細，哈哈！」
文：音樂組