鄧麗欣再遇就係結婚對象
鄧麗欣（Stephy）遇上導演杜汶澤產生化學作用，演技及星途一下子被大眾肯定。不論即將舉行的金像獎能否成功「封后」，Stephy已認定當真正演員是自己日後奮鬥的目標。事業上全力衝刺的她，直言不會再花時間在情路上跌碰：「遇到啱嘅人都可能係結婚對象喇！」態度相當明確！
在公
34歲的鄧麗欣出道16年，以偶像組合姿態加入樂壇，有屬於自己的金曲卻又「兼職」演戲，多年來歌手、演員身份兩邊跑，直到接拍杜汶澤電影《空手道》，Stephy終於得到大眾認同及被標籤為「up and coming影后之選」。愛形容自己「傻吓傻吓」的她，骨子裏卻充滿主見，更認定自己入行得多於失：「起碼我以前係個內向嘅人，入行之後見盡人生百態，了解他人之餘，對自己嘅認識亦加深咗好多。我會話自己已經有八成了解『鄧麗欣』呢個人。如果冇入行，我一定冇依家咁開心。」
唔覺被「阿寶」框住
外表柔弱、斯文的Stephy，私底下其實有搞笑細胞兼十分玩得，就如她形容凡事可以有兩面。以往或有觀眾批評她拍攝一系列「阿寶電影」，發揮有限兼被框在一個點，Stephy卻唱反調：「呢個系列嘅戲幫咗我好多就真，大家諗起『阿寶』就諗起我。由2006年斷斷續續拍到15年，係我同大家一齊成長嘅歲月，亦係我事業上嘅里程碑。冇呢段日子，絕對唔會有今日嘅我就真。」她又形容當日接《空》劇本時，感覺如「中頭獎」一樣，早前在「電影評論學會大獎」發表影后得獎感言，即忙不迭的多謝杜汶澤。
而說到令Stephy確定自己喜歡演戲，她不得不提導演彭發，在以往青葱歲月裏令她「開竅」：「當年佢搵我拍《寵愛》，嗰時年紀輕但角色沉鬱，真係好難演，但就係呢次機會，令我愛上演戲，知道拍戲究竟係乜嘢一回事。我唔敢話以後封咪唔唱歌，但希望大家以後會形容我係一個演員！」
Stephy坦言到紅館開個唱並非個人事業野心，反而這幾年積極鋪路「轉型」演戲，唱歌與演戲「地位」高下立見，目標態度相當清晰。
骨子裏性格樂天的Stephy，明白「一天的苦一天受」的道理，她從不為擔心不了的事情而庸人自擾。談到早前「封后」，她更搞笑地說：「坦白講，拍《空》片嘅時候我冇諗結果，今次連自己入咗圍、幾時公布賽果都唔知，直到接到消息先如夢初醒！其實咁都幾好，作為演員最緊要係毋忘初心啫！」
心郁郁想做「阿媽」
Stephy明白要當一個真正演員，外表的亮麗始終不及實際的表現成功：「依家可以話只係起步，未來我仲想挑戰唔同嘅角色。以前拍戲多數被安排『談情說愛』，但去到呢個年齡，真係好想試吓扮演母親，以親情去感動觀眾，又或者試吓奸角，帶出多啲新鮮感。」
在私
「方力申」影響人生觀
事業不愛計算，感情方面更加如是！Stephy不諱言如今不會在感情方面多費心力，恨嫁的心早已收起：「老土啲講，依家真係好想花多啲時間去演戲。去到我呢個年齡，唔會再花無謂時間去拍拖、享受浪漫，遇到啱嘅可能都已經係結婚對象，隨緣囉。」於單親家庭成長的她，幸而還相信愛情、相信婚姻！
與方力申分手至今，不少粉絲仍相信這對金童玉女可能會再續前緣。Stephy談到這位前度，表現磊落大方，「方力申」三個字似乎仍有分量：「咁多年以嚟，我喺佢身上學到嘅嘢唔少，亦或多或少影響我嘅人生觀。我哋一齊成長，好多時候佢都幫我解決問題，佢好正面嘅，絕對係個好男仔。」
後記：靠朋友接觸圈外世界
除了事業、除了家人，「朋友號」對鄧麗欣來說亦相當重要！
說到家中姐姐及哥哥都比自己年長十歲以上，加上雙親一早分開，Stephy自言從小性格已很獨立：「好似我唔鍾意搵人傾心事，有咩唔開心會自己冷靜吓，好快就冇事，不過我有班圈外好朋友，大家中學甚至小學已經認識，我唔會煩佢哋畀我訴苦，但佢哋絕對係我嘅減壓良伴！你知啦，娛圈工作少機會接觸外面嘅世界，透過我同佢哋嘅相處同分享，會畀機會我了解多啲圈外事物，咁樣可能都對日後演戲有幫助！」
文：影視組
攝：劉斌
服飾：SPORTMAX
髮型：Euling Chow@IL COLPO TST
場地：I's Land Cafe@Kwun Tong