王浩信重拾音樂夢盼紅館開騷
王浩信（Vincent）昨日演出音樂會，帶來多首大熱電視劇主題曲，歌手出身的他指現場對他來說是有特別意義的地方：「13年前瞞住屋企人簽做歌手，直至出咗第一首歌《訊號》，當係驚喜咁叫媽咪去睇，今日我媽咪都有嚟睇我。」
Vincent又讚戶外騷氣氛好：「好少可以喺咁旺嘅地方唱歌，大家反應好正，我唱完仲回味緊！」又指一直想重拾音樂夢：「我有個心願就係想開紅館騷，除咗拍劇都想可以喺音樂上面有成就。」他笑言平時常常不自覺哼歌，亦會唱歌給囡囡聽：「佢聽到我唱歌會跟住首歌一齊跳，（會唔會父女檔出騷？）我就覺得唔適合嘅，但個女好似有呢個意向，（叫埋太太一齊？）我都好期待有咁溫馨嘅畫面出現。」
