基仔寧願「攬炒」免歌迷捱貴飛
歌手古巨基相隔七年再踏紅館，成為「人夫」後首度在港開騷。基仔預告屆時會分享婚後點滴，面對演唱會門票勢遭「黃牛黨」狙擊，他呼籲歌迷勿買炒飛，情願對吉位唱與黃牛黨「攬炒」。
基仔昨日舉行《古巨基我們世界巡迴演唱會香港站特別版》記者會，並宣布加開一場，場數為5月11至14日合共4場，今日（4月4日）公開發售。基仔入行27年，大會安排10人戴着不同年代的基仔面具出場，顯示他在不同階段的轉變，又主持印上其歷年金曲的「拉布」儀式。英皇娛樂營運總裁霍汶希與英皇娛樂行政總裁許佩斯送超合金模型為他打氣，預祝場場爆滿。
人夫首開騷「婚」享點滴
記者會前一晚，基仔仍身在上海為其品牌舉行Fashion show，講到今次是婚後第一個紅館個唱，他說：「冇錯！呢個騷都係講一啲時光穿梭為主軸，當然婚姻都係人生一個階段，係會分享一下感受。」問到會否捉古太上台表演？他笑說：「上台？我唔知佢識表演啲乜喎？你知佢幾怕醜啦！」基仔又指分享的只是一些小點滴，不會先讓太太過目：「無論佢過唔過目都冇得畀佢還擊！（偷拍太太生活趣事？）嘩！樣就唔好啦！怕嚇親大家，佢咁……靚！」
行騷做埋生招牌
問到公開售票部分是否「絕望座位表」？基仔說：「我冇睇過但都知啲飛爆晒，所以即刻加場！我知道優先訂票都爆咗，好希望歌迷能夠以正價買到門票，千祈唔好買黃牛飛。」因黃牛飛猖獗，好友黃子華覺得情願對「吉位」都叫Fans不要買黃牛，基仔表示非常認同：「大家唔好去買，最多一齊『攬炒』，台下啲位咪由佢吉咗！冇人幫襯，到時黃牛先可以熄滅。」又指若「實名制」購票沒有影響正常歌迷買飛的話，他認為是可行。
另外，基仔前晚為自家品牌在上海舉行時裝騷，身兼設計師、時裝騷監製及模特兒三職，以一身賽車手造型行Catwalk，型格十足，贏得全場歡呼。
文：音樂組
攝：劉斌