吳彥祖接受本報專訪，談到與金像女星雅麗茜亞維嘉達（Alicia Vikander）合作的新片《盜墓者羅拉》（Tomb Raider）有難忘經歷：「我記得第一場拍攝船上風暴戲好震撼！佢哋整咗架船嘅一比一模型，放喺一個活動支架上等佢可以搖嚟搖去。現場又有個造雨機同幾支水炮，模仿大浪撞埋船嘅效果。當佢哋叫Action時所有嘢開始，真係好似喺風暴度咁！雅麗茜亞同我喺船上跌嚟跌去。當佢哋叫Cut時我哋好震驚咁對望，因為真係好得人驚。我哋唔使扮驚，因為真係好驚！我哋呢場拍咗五日。」
他自言早就熟悉《盜》的電子遊戲與舊版電影：「我玩過系列頭兩集，雖然我2002年後唔再打機，但我好記得玩《盜墓者羅拉》嘅回憶，佢基本上係第一隻女性主角嘅角色扮演遊戲。我亦都睇咗頭兩套戲。我最好朋友尹子維有份拍續集，我記得佢哋喺國際金融中心拍跳傘戲時去咗探班，所以我今次接拍前已經幾熟隻遊戲同電影。」他表示未有向參演舊版的任達華攞意見，因為兩個系列完全不同。他又指希望與模特兒太太Lisa S.所生的4歲女兒吳斐然，可以像羅拉般有意志力同毅力，變得強韌。
在荷里活發展已久的吳彥祖，透露有意回歸香港影壇：「我依家拍緊《荒原》（Into the Badlands）第三季，5月煞科。之後我好期待可以放個暑假，因為我已經連續做咗兩年嘢冇停過。我好想拍番香港製作，因為我好掛住呢個過去廿年我愛上嘅圈子，所以我短休後會睇吓有咩作品適合。」
文：外娛組