蔡一智遇高手 六指狂魔地位不保
草蜢成員蔡一智有「六指狂魔」之稱，天生右手有6隻手指，成為其個人標記。前日他睇演唱會時，竟遇上一名雙手共有12隻手指的「民間高手」，令其「六指狂魔」地位不保！同場有近日盛傳「甩拖」的天后容祖兒，她照舊單拖上陣，令分手傳聞疑幻似真。
蔡一智出名能歌善舞，其右手擁有6隻手指更是其特徵，有「六指狂魔」之稱。前日他偕太太及一眾好友，齊齊去亞洲博覽館睇騷，期間發生了一段小插曲，令「六指」再度成為熱話！
網民數手指眼花
蔡一智右手有6隻手指已屬罕見，豈料他竟在會場遇上一名工作人員，對方左、右手各有6隻手指，共有12隻手指，令他甘拜下風！難得遇上同路人，蔡一智上前要求合照，並留言：「今天遇見高手，多我一隻手指的叔叔，勁呀！」相中見他們先展示六指，然後再一同伸出雙手，網民紛紛表示很混亂，一時之間未能數清相中究竟有幾多隻手指，連天后容祖兒亦隔空呼應，留言：「呢位哥哥仲多過阿智一隻。」
祖兒又試一丁友
當晚天后祖兒亦有一同睇騷，雖然近日被傳與男友劉浩龍分手，但她睇騷期間仍非常投入，似乎未有被傳聞影響興致，但劉浩龍一如既往未有陪同女友現身，令「分訊」再度升溫。另外，同行還有歌手陳潔靈及DJ蘇施黃，眾人觀看演唱會後，更齊齊直落食消夜！
文：專案組