珍妮花爆「分」訊 網友起哄：翻撻畢佬啦！

「前畢嫂」珍妮花安妮絲頓（Jennifer Aniston）於情人節翌日與Justin發聯合聲明宣布分手，消息震撼全城！聲明中表示：「為咗避免大家繼續揣測，我哋決定宣布分手。我哋係雙方同意之下好和平咁喺上年底下咗決定，我哋係最好朋友，雖然唔再係夫婦，但期待可以延續我哋珍貴嘅友情。」他們又補充：「正常嚟講我哋會私底下進行，但因為八卦工業唔會放過呢個可以揣測同亂作嘅機會，我哋想直接講出真相。所有寫關於我哋、但唔係我哋直接交代嘅嘢，都係其他人作出嚟。最重要係，我哋想維持對對方深深嘅敬意同愛意。」

連日單獨現身

公開「分訊」前，珍妮花連日單獨與好友慶祝自己的49歲生日及出席艾倫迪珍妮絲（Ellen DeGeneres）的生日P，而Justin亦未有於社交網向珍妮花送上生日及情人節祝賀，他更被拍得情人節於紐約家門前搬行李，似乎希望於發聲明前搬走！此外，珍妮花爆「分訊」後首度外出，現身電影公司，全程未見笑容。

珍妮花與Justin 2007年相識，四年後拍喜劇《神化搞嘢樂園》（Wanderlust）撻着，2015年8月在洛杉磯家中舉行婚禮。珍妮花與Justin分別坐擁約15.6億及約1.56億港元身家，但有指二人有簽婚前協議，相信不會爭身家收場！

男衰口花 女搵前度傾心事

查實二人結婚兩年半期間不時傳婚變，對上一次公開露面是1月在墨西哥與友人度假，有指他們去年底曾吵大鑊，女方不滿老公於片場口花花撩女，Justin就嬲珍妮花搵影星前男友謝勒畢拿（Gerard Butler）傾感情煩惱，據悉1月的墨西哥之旅是為箍煲而設，可惜失敗收場。另有傳Justin自去年8月起已甚少現身兩公婆於紐約的寓所！

今次為珍妮花繼與畢彼特（Brad Pitt）2005年離婚後第二度失婚，雖然當年男方偷食致婚變，但畢佬前年與安祖蓮娜祖莉（Angelina Jolie）亦宣布離婚，安祖蓮娜由小三變正印但終極「離場」，不少網民都急急於社交網叫珍妮花食「回頭草」，與現時單身的畢佬再續前緣，相關話題亦引起網絡熱議！

宣「分」前 賀諧星Amy Schumer嫁人

珍妮花婚姻又觸礁，但無損她賀好友新婚之喜。其36歲諧星老友Amy Schumer周二於美國馬利布海邊與去年秋天拍拖的廚師男友Chris Fischer秘婚，事後公開大批勁Sweet的婚禮照，當時未公布婚姻破裂的珍妮花都有單拖到賀！婚禮約有80名賓客，包括奧斯卡影后珍妮花羅倫絲（Jennifer Lawrence）、男星積佳蘭賀（Jake Gyllenhaal）與Judd Apatow等。

文：外娛組