許廷鏗學唧花搵番初戀 Feel
去年轉投華納的歌手許廷鏗密密推出新歌及新碟，眼見好友鄭欣宜及衛蘭先後開紅館騷，他昨日出席活動時亦坦言已入紙紅館。席上學韓式唧花的他，又自爆初戀時會整心形牛扒氹另一半，認真浪漫！
歌手許廷鏗（Alfred）、江嘉敏（Kaman）及單文柔昨日出席《東港城ART DE FLEUR韓式唧花藝術展》，活動邀得韓國首席唧花藝術大師金善美（Kim Seon-Mee）及香港大師級唧花藝術家胡淑筠（Lyon）示範，並與新鴻基地產代理有限公司租務部總經理鍾秀蓮進行揭幕儀式，兩位大師又教Alfred、江嘉敏及單文柔唧花技巧，而Alfred更大獻歌喉。
首次接觸唧花藝術的Alfred表示，這門手藝需要很多耐性，跟補牙是兩回事，以為做牙醫的耐性已比常人高，但還是覺得很難！問到可曾製作手作給另一半？他說：「情人節整吓呢啲都幾好，不過我好幾年冇整，我整得嘅都係食得，好似心形牛扒。係初戀無限Touch嘅時候先會做呢啲嘢，大個咗就食餐飯算啦！」工作方面，Alfred透露農曆新年期間仍要開工，希望盡量抽時間陪家人。他又透露正籌備演唱會，並已入紙紅館，希望年底成事：「紅館舞台對自己嚟講係個情意結，係個夢想。」
江嘉敏否認緋聞
至於江嘉敏被問到有關暗撻出爐視帝王浩信一事，她揚言沒有看報道：「我比較活潑同男仔頭，可能大家見到嘅係粗魯嘅郁手郁腳，比較麻甩少少。」問到日後可會避忌？她自言已盡量收斂，並否認買咖啡及傳短訊給對方。問到與人夫傳緋聞可會唔開心，她說：「冇乜特別感覺，因為真係冇。」而王浩信接受訪問時亦澄清：「完全唔屬實，我同江嘉敏只係工作上嘅拍檔，只止於此，當幫套劇宣傳，希望唔好影響到家人，多謝大家關心。」
此外，單文柔自爆喜歡收花，但未到節日所以未收到男友陳展鵬的花，問到可有安慰在台慶頒獎禮食白果的展鵬，她說：「佢都係抱平常心，冇唔開心，過去都拎咗視帝！我哋有傾過，睇好馬國明同王浩信，佢哋拎獎都好開心。」
圖一
單文柔（左起）、香港蘭花大王千葉園始創人楊小龍、許廷鏗、新鴻基地產代理有限公司租務部總經理鍾秀蓮、江嘉敏、新鴻基地產代理有限公司租務部副總經理吳小偉、韓國首席唧花藝術大師金善美及香港唧花藝術家Lyon，齊齊出席活動。
文：音樂組
攝：吳文聰