處女作面世劉嘉玲喬裝入場睇反應

藝人劉嘉玲前晚出席監製新片的首映禮,同場有余香凝及歌手J.Arie等,嘉玲直言自己的工作已超額完成,問到首次擔任監製,對電影的評分如何?她說:「叫合格啦!(老公梁朝偉睇咗?)未呀,佢自己再睇啦!」並表示會喬裝入場,看觀眾反應。問到是否想再監製電影?嘉玲說:「希望拍愛情、警匪等題材。(會搵梁朝偉合作?)啱就會搵!軒仔(吳肇軒)都想搵,我想做佢經理人呀!一簽就簽佢10年,其實依家想簽多啲新人。(接受自薦?)接受,不過我唔知有咩途徑可以搵到新人,有啲未畢業就已經畀人簽咗!」

嘉玲又透露老公現時在日本旅遊,回港後要宣傳有份參演的賀歲片,提到她參演的英皇電影《我的情敵女婿》同為賀歲檔,可會打對台?她說:「幾好呀,可以打情罵俏!(同梁朝偉互相踩場去謝票?)我會睇佢嗰部呀,因為第一集都有睇,佢成日都話自己同自己打,咁我咪入場睇吓囉!」