每個人都有夢想，只係呢啲夢想好多時最後都難以實現。不過達唔到夢想嘅話，唔緊要，最重要係識得變通，然後再尋找新嘅夢想，總有一日可以達到理想境界，南韓人氣模特兒申惠羅正是如此。
出生於南韓首爾嘅模特兒申惠羅，原來佢當初嘅夢想並非想成為一位模特兒，而係希望成為一位旅遊達人周遊列國，兼開設旅行社。為咗圓夢，佢入讀大一觀光高等學校，專門研究唔同地方嘅文化，更以推動南韓旅遊業作為目標。不過，大家都知道夢想同現實有時真係可以相差好遠，佢發現要想達成夢想，最重要係有銀両，對於當時經濟拮据嘅佢嚟講，唔好話開設旅行社，就連出國旅遊都好困難。
呢個時候一位從事模特兒工作嘅朋友問佢，有冇興趣兼職做攝影模特兒，可以幫佢搵到快錢。對於平日冇乜打扮嘅申惠羅嚟講，莫講話要做攝影模特兒，就連平時都好少影相，家陣仲話做攝影模特兒難免要考慮一下。朋友就同佢講，以佢嘅樣貌同身材，加上高挑嘅身形，絕對有實力喺攝影模特兒界闖出名當，於是佢便抱着一試心態去面試，結果成為被取錄。起初佢只以搵錢嘅心態工作，後來慢慢覺得模特兒工作相當適合佢活躍好動嘅性格，令佢開始對呢份工作產生興趣。為咗裝備自己，佢參加儀態訓練班以提升實力，希望獲得更多工作機會。其實連佢自己都冇諗過，正係呢段時間不斷進修，成為佢未來勇闖模特兒界嘅基石。
畢業之後佢嘅旅遊夢想仲未熄滅，去咗一間旅行社工作，點知愈做愈覺得呢份工唔適合自己，令佢回想番昔日做兼職攝影模特兒嘅日子。正當佢內心掙扎之際，有日佢收到模特兒事務所嘅電話，對方表示想搵佢客串做模特兒，佢即時答應，同時透過呢次機會決定當全職模特兒。擁有豐富演出工作經驗嘅佢，回歸之後不但游刃有餘，而且佢變得成熟有女人味，同時身材變得更加玲瓏浮凸，尤其係激凸嘅上圍，相當吸引迷人。隨住人氣不斷上升，事務所安排佢以車模身份參加第一屆南韓改裝車展，惠羅表示呢次大型活動令佢相當緊張，幸好仍能以最佳狀態示人，更成為展場其中一個焦點。
經過呢次成功演出後，事務所對惠羅充滿信心，安排佢喺多個國際車展上登場，與此同時，佢又踩入賽車女郎界，化身成性感迷人賽車女郎喺賽車活動上亮相。不過講到令佢人氣爆發嘅關鍵，在於佢獲得事務所推薦參加第4屆南韓賽車模特兒大賽，經過一番角逐，最後佢奪得最具潛力新人獎。呢個獎項不但證明佢有實力，同時亦令佢嘅知名度大大提升。有人問過佢現時嘅夢想係乜？佢表示希望能夠成為一位出色及具代表性嘅模特兒。
簡介：雖然申惠羅當初嘅夢想同現今有相當大出入，但對佢嚟講最重要係把握現在，先至可以計劃將來。不過有樣嘢佢卻唔係咁開心，就係大家總係將焦點放喺佢嘅身材上。其實呢位火辣女模亦係一位外語專家，精通英語、日語及法語，認真厲害！如果大家想了解佢多啲，就要Click入呢個網站睇睇。
網址：http://cafe.daum.net/seh-9211
出生地：首爾
身高：173cm
三圍：34-24-34
撰文：魂