JW轟新城大細超No Show抗議
今年狀態大勇的歌手JW（王灝兒）在各大頒獎禮入圍不少獎項，卻有傳因為獎項拗唔掂數而缺席前晚的《新城》頒獎禮，實行以行動杯葛。更火上加油的，就是其他有獎冇到的歌手都有機會拍片致謝，JW得半個合唱獎，新城卻沒有邀請她拍片，被當冇到，令JW很不好受，故此嬲上加嬲！
歌手JW前晚缺席《新城勁爆頒獎禮》，反而有出席昨晚的《勁歌金曲頒獎典禮》並奪得獎項。有傳她缺席新城的原因是「獎項拗唔掂數」，故此No Show抗議，不過最令她生氣是新城「大細超」及有感自己「不受尊重」。據知情者透露：「JW好唔開心，相比王菀之同鄭欣宜，覺得自己唔係輸在唔夠努力同冇成績，係佢『衰』在唔係身在大公司，又唔夠人哋有『人事』。同樣令佢嬲嘅係有獎冇到嘅歌手，新城都會叫佢拍片喺頒獎禮度播，佢同吳業坤有首合唱歌得獎，但電台連邀請佢拍片都冇，覺得有人當佢『冇到』，JW好Hard Feeling。」
農夫唱反調
JW的唱片公司發言人受訪時，被問到JW為何缺席《新城》頒獎禮？發言人說：「因為JW要全力綵排紅館演唱會。」對於傳聞，發言人只稱：「JW今年成績，大家有目共睹，其實佢好樂意同任何電台、電視台合作。」而昨晚JW現身《勁歌金曲頒獎典禮》時否認杯葛新城，出席到《勁歌》純粹是碰巧有時間。問到是否不服失落女歌手獎？她說：「獎項年年都係得兩、三個，Janice（衛蘭）、Ivana（王菀之）都有好多好歌。（你都有好歌。）咁AGA同Gin Lee都好努力，唔係睇獎項，最緊要大家開心。」巧合是環球唱片的AGA與Gin Lee都缺席《新城》頒獎禮。
至於農夫同樣在《新城》頒獎禮中冇出席都得獎，亦沒有獲邀請拍片，兩子昨日受訪時均不覺得不受尊重：「反而冇出席都畀獎係非常尊重我哋。」
柏豪唔跟公司 照嚟！
此外，提到星夢娛樂及環球都杯葛新城，星夢旗下的周柏豪說：「知道自己唱片公司唔出席，但因為我今年比較特別，成年嘅時間都係跨咗兩間唱片公司，咁我唔可以抹殺其他單位嘅努力。」又謂都是這幾天才收到消息，問到公司有否要求缺席？他稱公司有詢問其出席意願，並重申尊重公司決定：「我自己選擇咗嚟，都有同公司解釋番原因，公司好支持我做嘅每一樣嘢。」至於新城知訊台節目執行總監程凱欣受訪時，坦言沒聽過唱片公司杯葛，頒獎禮前彼此一直有保持聯繫。
文：音樂組
攝：鄭家俊、劉斌、吳文聰