鎮宇方中信地府落鑊凍到震
影后吳君如處女執導，獲吳鎮宇及方中信兩位影帝幫到盡，更於7度低溫拍攝「落油鑊」戲，結果兩男連浸了十多小時水，差點變雪條，凍到呆的他們，上水第一時間以熱飲及杯麵保暖！
曾於電影任監製的吳君如，最近參演新片《妖鈴鈴》兼任導演一職，獲吳鎮宇及方中信兩位好友助陣，除了鎮宇畀面肯拍大夜班的戲、方中信亦破格以禿頭造型示人，原來二人還有一場終極場口，於內地7度低溫下拍攝「落油鑊」濕身戲。
由於要拍攝多個角度，方中信與鎮宇浸水十多小時，雖然工作人員多次加熱水，但仍難抵寒冷天氣，結果熱水浸到變凍水，二人一度凍到呆若木雞，差點變雪條！
乾完又濕無限Loop
完成戲份後，二人上水即要飲熱飲及食杯麵取暖，不過兩位影帝沒有半句怨言，甚少吃內地杯麵的鎮宇還大讚好味，他笑說：「場戲講我哋不斷被『炸』，喺油鑊度上上落落，熱水梗係變凍水，以前多數拍落水救人，兩Take搞掂，但今次每次上水就要畀工作人員整番乾啲衫再落水，真係凍，不過最難忘係第一次食某內地牌子嘅杯麵，又幾好味喎！（係咪覺得畀君如呃咗接戲？）之前講笑啫！同君如好耐冇合作，難得個題材又咁好玩。」
曾執導演筒的鎮宇，對於好友首次執導的表現不禁畀讚：「做得唔錯，君如喺片場好鍾意問意見，有叫我哋一齊幫手度，最後佢會用番自己嘅想法，不過效果又幾好，所以呢個三姑（君如暱稱）真係有料到。」
文：影視組