周迅孖陳輝虹開餐 high到拗腰

早前分別與謝霆鋒及梁朝偉傳緋聞的內地花旦周迅，似乎未受緋聞影響，日前被內地傳媒拍到與製作人兼林憶蓮舊愛陳輝虹在北京共進午餐。當日中午周迅離家後登上保母車，直駛至一間越南餐廳，並孖住同行的製作人陳輝虹一同下車步進餐廳。

表情搞鬼

大約個多小時後，二人並肩離開，素顏上陣的周迅穿上牛仔短褲及雪紡上衣，非常隨意，但發現她兩邊面頰長滿暗瘡。家有愛妻兼音樂才女黃丹儀的陳輝虹，與周迅亦不避嫌邊散步邊講笑，當日心情靚爆的她，不時手舞足蹈，愈傾愈興奮，更笑到向後拗腰，其後即使發現記者，亦大方向鏡頭做出搞鬼動作，十分惹笑！最後周迅與陳輝虹各自走人，周迅登上保姆車回家，陳輝虹則自行搭車離去。

維護好友

其後陳輝虹就此接受本報訪問，表示不怕與周迅傳緋聞：「我哋識咗好耐，絕對唔會有緋聞，我自己又有家室，唔好亂咁估！」他又透露近日與周迅的工作室合作：「嗰日朝頭早開完會，下晝就順便食飯。第一次同周迅喺電影同音樂上合作，好欣賞佢多才多藝，特別係電影方面。」提到周迅滿面痘痘，他就替好友解釋：「佢呢排做緊皮膚護理啫！」

文：專案組