莊思敏拉思明滿場飛喪吹冧客！

於娛樂圈打滾多年的莊思敏，近年開始有投資習慣，繼餐廳、自家品牌護膚品及運動服後，最近連酒吧都有興趣，豪擲七位數字於銅鑼灣耀華街開樓上酒吧，認真百足咁多爪！面對該區酒吧林立競爭大，莊思敏把心一橫於酒吧增設時興的拋乒乓波機及多功能遊戲枱吸客。

不斷被集郵

日前該酒吧進行試業，莊思敏即拉埋妹妹莊思明落場拉客，甫出現即引來客人歡呼，及後更不斷被集郵，但兩姊妹照單全收。期間一部遊戲機突然失靈，為免令客人失望，莊思敏即走上前化身人肉吹水機與眾人喪吹，氹得客人們個個笑哈哈，及後轉陣到另一部多功能遊戲枱，職員見老闆娘在場即上前細心解釋，又讓她試玩，客人見莊思敏玩得如此興奮，亦唔執輸上前圍觀。

至於思明玩完一輪過後，便把焦點落在手機上，期間喪打字及甜笑，未知是否與男友楊明傳情，相反莊思敏就繼續開行Turbo於酒吧內巡視，走入調酒區望完一輪，又以手機拍下擺位，接着與職員研究，又與調酒師研究Drink List，忙得不可開交。

莊氏姊妹花與男客人集郵，又與女客人吹水。	放大圖片	莊思敏陪客玩遊戲都表現投入。

一條龍服務

本報其後聯絡莊思敏，她承認有份投資：「其實都係情意結嚟嘅，因為十幾年前我喺同一地方投資過酒吧，今次算係捲土重來囉！都係同班朋友夾份啫，未正式開嘅，試業階段中。（投資咁多範疇！）樣樣都有啲唔好咩？都想一條龍服務o架！（咁忙邊有時間拍拖？）又真係幾忙，不過拖梗係想拍，依家冇咪搵吓錢先，相信上天自會有安排。」

文：影視組