曾國祥煲煙累事辣(興)王敏奕
藝人曾志偉的兒子曾國祥與女友王敏奕日前拍拖到中環買咖啡時，煙癮起的曾國祥丟低女友排隊，自己走出戶外「呼吸」，而王敏奕見就快排到，於是心急致電叫男友回來，奈何曾國祥掛住煲煙未有理會，搞到女友黑晒口面。
現年38歲的曾國祥與女友王敏奕拍拖逾三年半，不時被拍得恩愛出巡行街買餸返屋企煮飯仔，感情穩定。雖然曾國祥表示暫未有計劃結婚，但已視王敏奕為終身伴侶，希望可以與對方長相廝守。
日前傍晚6時許，曾國祥與王敏奕戴住情侶文青眼鏡現身中環行街，途經該處一間咖啡專賣店時，他們在門外傾談幾句便雙雙入內排隊買咖啡。
極速施冧功
原本齊齊排隊，但曾國祥突然煙癮起，於是獨自走出戶外抽煙，留下女友排隊。一直排隊的王敏奕，見到快將輪到自己即心急打電話給男友，奈何曾國祥掛住煲煙睇風景，完全沒有聽電話，王敏奕即時黑口黑面，並不停向店外的曾國祥揮手示意，直至男友接電話為止。曾國祥返回店內即施冧女本色，三兩下手勢令女友笑番晒。其後各持一杯熱咖啡，邊行邊飲往停車場取車。
文、攝：追蹤組