岑日珈「爆肚」死過翻生 腸絞痛又入院
歌手岑日珈因腸絞痛入院，原來她過去十年飽受腸胃問題困擾，不時因腸抽筋入院，更自爆是13歲時一次大手術導致的後遺症，當年要入住深切治療病房，在醫院住足成個月，死過翻生。
岑日珈（Angie）前晚因腸絞痛入院觀察，她說：「每年都會有一次腸抽筋，好多時入院都因為咁，今次都好突然痛，喺屋企廁所痛到坐喺地下。（依家點？）打咗止痛針好啲，不過撳落去依然有啲痛，因為一痛就食唔到嘢，會想嘔，所以要吊鹽水，暫時不能進食。」
自細就腸胃欠佳的Angie解釋，因為13歲讀中一時做大手術的後遺症：「我嗰時因為盲腸炎去咗醫院，但個醫生做得唔好，佢等我條腸爆咗先推我入手術室，又冇清潔好晒啲膿，因為手術後一星期，我依然痛到行唔到，點解普通盲腸炎都康復唔到？」
ICU住足一個月
她再去醫院照X光，並即時入手術室再做一次手術：「原來啲膿已經發脹咗，演變成腹膜炎、盆腔炎，腹腔、肚呀全部都發炎，我仲記得我要入ICU，喺醫院住咗一個月，因為係好大手術，所以醫生之後都話我食嘢只能六成飽，條腸真係比普通人弱好多，肚嘅位置都唔好做太劇烈嘅嘢。」
搵律師告唔入
Angie指當年是到公立醫院做盲腸手術，有關方面以非屬第一類急症處理：「嗰時要等位吖嘛，佢哋心目中大肚婆或有咩意外先係最急症，我係睇住自己個肚變咗好似十月懷胎咁大，爆嗰刻真係勁痛，佢哋咪推我入手術室。（有冇投訴？）有呀，媽咪有搵律師，但最後告唔入，佢哋話我冇死到！」她還幽自己一默指當年手術後，瘦到得82磅：「因為成個月冇食嘢，齋吊營養液，嗰時好瘦，唔似依家肥到咁。」
文：音樂組