林鈺洧兼職模特兒揀啱Job先做
星二代模特兒林鈺洧憑「林俊賢之女」之名入行，出道兩年多的她，最近轉回老本行做名牌客戶顧問，放假才做兼職模特兒，自認很好彩，能夠同時兼顧兩份鍾意的工作，對模特兒工作仍然充滿熱情。
現年22歲的林鈺洧（Denice）是藝人林俊賢之女，母親是中英混血兒，她遺傳了四分一的混血兒外貌，而且身材高挑，甫出道已受到注目，不過圈中「星二代」何其多，僧多粥少，工作量開始後勁不繼，消失了一段時間的她，坦言已經轉行，她說：「依家幫一間大嘅名牌公司做客戶顧問，已經做咗半年，放假或者放工時間就啱先會接模特兒工作做，所以最近大家少咗見我。（對呢個圈心淡？）其實係兩邊發展，因為模特兒嘅工作冇主動權、少選擇，我入行前其實做過客戶顧問，有關護膚品、珠寶同時裝嘅客戶顧問都做過，咁啱有機會畀我做番本行，自己又鍾意對人，所以做得好開心，會長期發展。但模特兒工作我唔會放棄，兩樣工作都鍾意，冇咗一邊都會唔開心。」
身兼兩職嗌好彩
她稱初入行做模特兒時，有工作便接，沒有理會是否適合，她說：「以前接過啲戶外運動用品工作，其實自己都唔鍾意露營，同我嘅品味同習慣唔同，依家就唔會接，只會揀一啲自己鍾意嘅工作，我鍾意時裝、鍾意Bling Bling珠寶同設計師Crossover作品，喜歡時尚嘅嘢，我喺度諗，如果連自己都唔鍾意嘅嘢，點樣去演繹個品牌？」
Denice笑言正職收入可觀，難怪容許她揀兼職工作來做，對於圈中「星二代」湧現形成競爭，她卻不認同：「大家嘅父母都唔同，特性、樣貌亦唔同，唔可以話競爭，自己都唔會同人比較，有自己嘅方向，唔應該有衝突。（覺得自己欠缺運氣？）我反而覺得自己幾好彩，有正職兼職，兩樣嘢都鍾意做，已經好好彩，我好易滿足，好感恩。」
文：名人組