面和心不和？黎燕珊羅霖冇偈傾影完相即閃
兩位前亞洲小姐冠軍黎燕珊與羅霖屢傳不和，早前齊齊睇演唱會並排而坐，有傾有講，以為已冰釋前嫌，但原來「面和心不和」。昨日二人出席活動時影合照笑晒口，但影完即背對背各自走開冇偈傾。
一直被指不和的黎燕珊和羅霖，昨日與黃佩霞、鄭明明、韓君婷等出席活動。黎燕珊與羅霖各自與友人傾偈，到影大合照時，二人笑容滿面並肩而企，但影完相即閃，完全冇傾談。
搵錢幫兒子交學費
黎燕珊透露兒子日前生日，首次沒有一起度過，當日近12時與身在英國讀書的兒子視像通話：「好掛住佢，但我忍住冇喊，佢叫我接多啲工作，唔使咁掛住佢。」她稱下月到新加坡唱歌，密密接工作，搵錢幫兒子交學費。她又指兒子修讀犯罪學是想加入警隊，故幫兒子約了不少警隊朋友詢問意見。提到有傳亞視復活，與無綫有兩年合約的她表示：「好多同事都會返去，人工比以前水平高一半。（搵你？）我過咗檔，暫時賣身過隔籬。」
未試過主動錫男人
至於羅霖透露身在美國讀書的二仔早前傳短訊給她，指覺得媽媽很重要，一時感觸思鄉，令羅霖又驚又感動。她表示知道亞視開網站，已收到邀請通知，若時間配合會支持。她又稱快將拍完網絡電影，要主動錫男演員：「未試過主動。（搵男友試？）唔會，嚇死佢咩。」
文：名人組