陪「大媽」君如捉妖 方中信冇晒型象 禿頭變大叔
吳君如今年將聯同方中信、吳鎮宇於聖誕放笑彈，在君如首次執導的新片中犧牲色相！君如化身「大媽」捉妖，鎮宇則穿上娘爆皮褸扮過氣古惑仔，但最激的是方中信慘變「地中海」大叔，旨在博觀眾一笑！
繼電影《金雞SSS》與《12金鴨》後，吳君如再有新作在聖誕檔上映！她在新片《妖妖鈴》中孭重飛兼做導演，唔玩反串、唔玩逆齡由年輕演到老，反而玩「搞笑娘」，以曲短髮配粗眉化身「大媽」去捉鬼。今次是君如首次執導，特別拉埋老友方中信與吳鎮宇一齊玩，兩人的戲中造型都相當「頂癮」！鎮宇穿上「流蘇皮褸」做過氣古惑仔，型佬方中信則慘變「地中海大叔」，三人齊齊將形象鎖在夾萬，造型爆趣！
由於君如由開拍至完工都秘密進行，故此當《妖》片推出預告時，網上隨即瘋傳，點擊近億！預告片大受歡迎，她當然大感高興，對於一班「好兄弟」犧牲色相，她笑說：「唔可以咁講，係好好玩！佢哋好少扮呢啲Look，好貼地又好切合佢哋實際年齡，只係佢哋兩個都Keep得好，外表逆晒齡啫！」
老婆執導 陳可辛阻「玩火」捱罵
今次電影由陳可辛任監製，早前兩人到內地宣傳時便爆出不少趣事。君如指兩人經常「激烈地」溝通，陳可辛則指對吳君如今次當導演，就好像睇到屋企小朋友玩火：「不能不攔，但攔親都要捱罵！」
文：影視組