鄧麗欣女排降班 安排「身後事」
藝人鄧麗欣（Stephy）領軍的排球隊Loey昨日「護級」失敗，降回丙組，見Stephy和隊友都冇晒心機。講到輸波，Stephy坦言：「因為先輸第一局，到打第二局時，大家心態知唔輸得，太緊張就更發揮唔到平時水準。」問到可有安慰隊員？Stephy幽默地說：「有呀，同埋都要安排『身後事』，即係睇吓究竟點行，我會繼續保留球隊，至於隊員打唔打就睇佢哋意願，因為降班要重頭打過係好辛苦。」而現年33歲的她竟認老，表示明年未必落場再戰：「下年未必見到我啦，我老啦！之前練波已經拉傷肌肉，年紀大啦！（你體力仲好好？）OK嘅有Keep住，唔Keep點得呀，個個球員都細我咁多。今年放咗好多時間打波，如果拍番戲好難再兼顧到，但球隊會繼續搞，我唔會放棄嘅。」
另外，講到蘇麗珊將接拍葉念琛新片飾演「阿寶」一角，被指取代了Stephy，Stephy對此說：「其實『阿寶』都好多人做過，唔係我專屬，佢啲戲嘅女主角都叫阿寶，所以冇乜話取代唔取代。」
