盧凱彤Man爆等生B找埋何詩條數？

依家31歲嘅Ellen同拍檔林二汶，由黃耀明一手帶出道。當年Ellen得15歲，二汶就19歲，攞個平均數就變咗「at17」。兩個玩音樂創作嘅文青女，佢哋首《始終一天》，我Nuts哥都識得唱兩嘴，當年呢兩個妹妹仲橫掃唔少樂壇組合獎同銷量獎。而Ellen同二汶嘅獨特「性」格，都曾惹起唔少揣測，有傳過佢哋「sheshe戀」，最睇唔出嘅係出道「純純樣」嘅Ellen，原來可以去得咁盡，尤其佢同二汶喺音樂上分道揚鑣後，Ellen嘅「陽氣」似乎更浮面。

打爛十年齋缽

睇番Ellen歷年行事嘅往績，都勁「出人意表」，好似無端端剃光頭，食素十年竟然重新食肉，又患躁鬱症想過尋死，幾經折磨先戰勝惡疾，可以話死過翻生仲有乜好驚，梗係開行Turbo搵真愛！所以，唔少人都預咗Ellen遲早嗌「出櫃」，只係萬萬冇諗到佢仲勁過出櫃鼻祖何韻詩，將「sheshe戀」修成正果，升呢2.0版，做咗香港首位「同性婚姻」女歌手。

Nuts哥記得荷里活影星茱迪科士打（Jodie Foster），早喺十幾年前就已做先鋒，去搵「精子銀行」生咗兩個小朋友。至於早過Ellen Come out嘅何韻詩亦曾講過想兩年內生B，可惜到今時今日仍「未找數」。唔好話我Nuts哥吹水亂噏，「彩虹戰士」Ellen性格敢愛敢做，娶完台妹做咗「寶島女婿」後，佢曾講過自己同「另一半」思想前衞，所以同性生B呢樣嘢，Ellen分分鐘又爬何韻詩頭找埋佢條數，成為新Icon！事關Ellen早就已做埋跟得老公移居台灣落地生根，兩年後台灣同性婚姻又合法化，Ellen就攞正牌做「人夫」，錫住「老婆」嘅佢分分鐘負責生埋B，都好合乎佢嘅「估你唔到」作風！

天王天后(R)影沙龍

對於「盧太」余靜萍（小魚），可能好多香港人唔知佢係乜水，Nuts哥嘅台灣朋友圈就無一唔識呢位「星級」攝影師，仲話講人氣、知名度遠遠勝過佢「老公」Ellen。事關經「盧太」鏡頭下拍過嘅藝人歌手，全都係台灣最Top嘅，好似周杰倫、蔡依林……就連香港嘅天王天后陳奕迅同容祖兒，都馴服於佢鏡頭之下。而Ellen嘅唱片到演唱會海報，都係出自「太太」小魚嘅精心傑作，除咗Ellen外，要搵「盧太」影輯「沙龍」真係要排隊攞籌先啦！

Nuts哥