楊受成力撐 五億人仔打造新片 林超賢闖軍事重地 5戰艦護航
英皇電影投資5億人民幣的大片《紅海行動》即將煞科，今次台前幕後面對拍攝時種種逆境毫無怨言，令導演林超賢大為感動，不過他自爆曾遇上翻車，兼且差點拍到抑鬱症，健康狀況令人擔心。身為老闆的楊受成昨日專程飛往湛江支持及參與記者會。
由英皇電影與博納電影聯合投資、林超賢執導的新片《紅海行動》，早前完成摩洛哥外景戲份後，近日「轉戰」內地湛江繼續拍攝。台前幕後包括演員張涵予、張譯、杜江、霍思燕昨日聯同英皇主席楊受成及博納董事長于冬等，於當地舉行電影大型發布會，場面熱鬧。
海陸空全方位拍攝
對於這部投資5億人民幣的大片即將煞科，楊受成說：「呢部係首部全景展現中國現代化海軍電影，發布會仲邀請到海軍政治部及海軍陸戰隊隊員出席，絕對係製作隊嘅榮幸。林導嘅專業不容置疑，我相信佢一定可以拍出緊張刺激嘅場面，帶畀觀眾不一樣嘅感受。」
林超賢接受電話訪問時談到《紅》片的重頭戲，他透露前日拍攝一場出動5艘戰艦護航以及600個海軍陸戰隊參與演出的戲份：「嗰日我哋同時以海、陸、空角度去拍攝，單單戰艦駛出南海都花上5小時，點知嗰日湛江遇上大雷雨影響咗少少進度，日內相信要補拍啲鏡頭。」今次團隊可進入內地軍事重地進行拍攝，同時見識到戰艦日常繁忙的調配及行動，令林超賢大感新鮮。
意外翻車受傷
談到摩洛哥外景部分，林超賢慨嘆：「拍咗咁多年戲都未試過咁辛苦，我哋去一個十分落後嘅地方拍咗兩個月，總之冇啖好食，氣溫超過40度，成日沙塵暴。我同演員住喺間最好嘅酒店，但連餐廳都冇，個個畀嘢咬到周身都係，其中女演員海青被咬到面腫，好彩戲服有面紗同頭巾，加埋化妝先勉強開到工，我自己就試過翻車整傷頭同手，拍拍吓情緒好低落，覺得自己好似被充軍一樣，所以不得不讚台前幕後都好齊心，大家一句怨言都冇。」
文：影視組