王菀之扮阿伯迷倒老公勁加分
人妻王菀之（Ivana）主演的舞台劇即將公演，她自爆老公蘇卓航（Eric So）當年睇過此劇後，因其飾演角色而對她傾心，其後二人更火速拍拖，Eric So即被取笑重口味，因為Ivana在劇中是扮男人的「阿伯」！
Ivana日前與梁祖堯、湯駿業（Ah Dee）為7月再度公演的舞台劇第六集排練，Ivana上次與張敬軒開演唱會，被對方投訴經常要趕回家煮飯給Eric So吃，她笑言今次掉轉，由老公為她煮飯：「今次呢啲係佢做。」祖堯提議幫手服侍她老公，她即贊成：「都好吖，或者叫佢嚟呢度開飯囉。（老公望住你排戲都得？）我好想！但佢唔會嚟，但佢好鍾意去睇。」她大爆Eric So當年因此劇而對她加分，兩人繼而迅速拍拖：「佢嚟咗睇，嗰時識咗但未拍拖。佢見到我個角色王伯，就話點解會咁嘅？佢係因為王伯而墮入情網！」Ah Dee即笑說Eric So重囗味：「佢唔只鍾意男人，係鍾意一個女人扮嘅男人，仲係阿伯！ 」
師奶上身教路
講到各人在劇中曾分飾多個角色，問到最喜歡哪一個？祖堯笑言最喜歡「超市喪屍」內貪心的梁師奶：「超市臨收工有人貼特價紙，大家都喺度捕。呢個係我嘅真實體驗，亦都係自己嘅嗜好，演起上嚟得心應手。」人妻Ivana亦師奶上身說：「9點半之前同之後個價係差一截！有時未必需要去搶，有策略嘅，見到人多唔一定去嗰度，因為超市好大，仲有好多地方減價，你要去番間熟路少少嘅。」兩個「師奶」提供必搶攻略，指沙律、飯團和麵包都會特價。
靠關係做程式員
Ah Dee則自稱溫文爾雅又內斂，飾演暴躁的便利店顧客特別有挑戰性：「個角色畀工作壓抑，冇地方發洩就鬧個便利店員工。鬧嗰陣自己好過癮，觀眾就覺得我好可笑。」這時Ivana戲癮大發，即席演繹角色高層Iris獨特的說話方式，非常爆笑，她亦自爆曾經靠關係做過程式員，Ah Dee很驚訝她懂得寫程式，她笑說：「梗係唔識啦，所以去咗做影印、叫下午茶同少少執拾嘅工作。我係最低，人哋都唔敢卸嘢畀我做，因為我真心唔識，就自己搵嘢做。」
此外，王菀之最近拍攝廣告時大玩變身術，分別化身斯里蘭卡女郎、歐洲貴族及印度女郎等，過足扮嘢癮！
文：音樂組
攝：黎志輝
王菀之化妝：Janice Tao（ZING the Make UP School）
髮型：Kate Shek（Hair Culture）
服裝：ZUCCa@I.T