黃紫盈廚房拜師酒過界整Cake
星級主持黃紫盈（Connie）離開大台後發展不俗，間中會接司儀和主持工作，但其實她志不在此，去年她推出個人酒品牌，實行向商界發展，日前她現身銅鑼灣一間Cafe，與女友人摸酒杯底密密傾，傾傾吓更直入廚房，莫非想學廚做美女廚神？
當日穿花裙的黃紫盈拿着一袋二袋步往銅鑼灣一間Cafe，原來相約一名女友人，甫見面黃紫盈即從袋中拿出一瓶紅酒，並純熟地開瓶品嘗，酒過三巡，兩人依然面不改容，毫無醉意，似乎甚為飲得，之後她們突然起身直入廚房，職員還為她們開門，更向女友人點頭叫「老闆娘」，原來女友人乃餐廳的老闆。
跌食材落地
入廚房後，兩人夾手夾腳炮製魚子醬甜品，紫盈看來非常專心，但途中「蝦碌」不慎將食材跌到地上，她下意識拾回放進垃圾桶，洗過手再繼續做甜品，非常衞生。完成甜品後，當然相機食先，紫盈即叫朋友為她拍照留念，之後拜託侍應將製成品放回餐桌，再埋位慢慢享用，一邊品酒一邊吃甜品，認真識飲識食。
廚藝攞金牌
事後，問到紫盈是否想拜師學廚？她說：「我想呀！本身都為食，我以前考咗個香港青年獎勵計劃，攞咗個金牌，其中一部分就係學整Cake，不過同依家啲Cake比就好初級，我同嗰間餐廳嘅老闆娘好熟，傾緊合作，製作酒味嘅甜品。其實今次係第二次整，用我啲萄葡果味氣酒做甜品，都幾得意。（你好飲得？）哈哈！未試過飲醉囉，去到某個位我就會停，唔鍾意飲到紅卜卜，飲到頭痛唔知為乜，鍾意Enjoy多啲。」
文：名人組