鄺文珣自爆湊仔亂嚟

息影多年的May近年不時於社交網上載靚相，令人驚嘆她美貌十年如一日，完全看不出已是兩子之母！4月時她更宣布懷有第三胎，問到是否刻意追女？May笑笑口否認：「其實第三胎又唔係話特別計劃，咁多年嚟老公有時都會提吓，不如生番個啦？咁多年我都唔睬佢，覺得好大責任喎生多個！因為我已經有兩個，仲要生多個，要照顧仔，又照顧老公，點算呢？」所以身為基督徒的她認為這次懷孕是神的禮物。

老公身教有方

至於問到BB性別，May就繼續保持神秘，但笑言老公想要女兒：「呢個唔係佢控制之內，我都想係女嘅，不過仔同女我都OK，我湊慣仔，唔係好識湊女，如果係仔，亂嚟都得嘛！」May透露現年8歲的哥哥Cadence和6歲的弟弟Casper知道她懷孕後變得懂事，又甜絲絲把功勞歸於老公：「佢哋見到Daddy點照顧我，有好嘅身教，仔係會follow，因為Daddy去邊都幫我拎手袋，所以哥哥同細佬有時同我出去，都會話：『媽咪拎袋嚟』！」

鄺文珣近年投身慈善工作。	鄺文珣大讚老公以身作則，令囝囝都學識照顧媽咪。	鄺文珣最希望囝囝長大後樂於助人。

帶囝囝探訪孤兒

明白身教重要，為慈善機構一項計劃出任大使的May就曾帶同Cadence和Casper到內地探訪孤兒，May表示：「當中睇到佢哋好願意做，由好驚變到好願意同大家做朋友，希望佢哋係一個On Going嘅關係。有時啲人做善事係覺得佢可憐，做完滿足自己內心，覺得幫咗人好開心。但我唔想佢哋有呢個心態，希望佢哋知道要努力讀書，之後就可以幫到人。」同時身兼計劃籌款委員會主席的May，於過去一年亦有帶隊探訪：「主要幫內地孤兒做醫療，佢哋有先天性問題，我哋設計個地方畀佢哋住，養好身體先做手術，手術後又可以喺度做事後療養。」

文：李惠儀

攝：張福宏

服裝：SLY、Moussy

首飾：Les Néréides

化妝：MoMo Chow&Pheobe@嫁妝

鞋履：SLY

場地：東來順@帝苑酒店