歐家裕影婚照中伏想喊
曾參與ViuTV選美節目兼鄧麗欣排球隊前成員的模特兒歐家裕（Joe），日前與拍拖一年的航運富二代Jacky拉埋天窗，正式成為人妻。二人在五星級酒店筵開約四十圍，場地以花海為背景，並有二人英文名頭字母雙J logo設計。Joe更化身仙子上身透視示人，十分性感。二人在一眾親友見證下簽字成為夫妻，不時錫錫晒恩愛。Joe直言見到朋友落力幫手好感動，特別是見到爸爸：「平時爸爸比較內斂，見到佢好開心飲茶都眼濕濕。」
大師變學生
結婚本來是開心事，但Joe卻透露早前在港影婚紗相影到一肚氣，要三催四請才執相，又勁遲收到相，令她不開心，但最大的問題是感覺影完似學生相，她說：「唯一一樣嘢唔開心係婚紗相，影得好求其，喺studio啲相，個陰影仲搶過我哋，又要我催攝影師執相，出外景冇反光板，唔打燈，閃光燈都冇，價錢唔係平，影出嚟好似學生作品咁，3,000張相入面，揀60張相都揀得好勉強，激死我！啲人仲話佢出名，我真係想喊。」她亦透露為此而要去歐洲影多輯婚紗相，留下珍貴片段。
文：名人組