吳佩孚老婆被惡搞怒斥：點會80蚊咁平

風水師吳佩孚的太太捲入惡搞事件，網上流傳一張通街擺放的「色情易拉架廣告」，除附上一女子的相片外，並聲稱「正宗住家少婦，為救夫君，甘願下海」，列出80蚊可提供80分鐘的「服務」，還留下一個聲稱是「吳太」的手提電話號碼，而網民亦有轉載此「廣告相」，更有人指相中女子是吳佩孚太太。記者曾到疑擺放「色情易拉架廣告」的尖沙咀金馬倫道查看，未有發現該「廣告」，再致電廣告上「吳太」的手提電話，接聽的男子說：「冇吳太，係畀人整蠱，已經報咗警，唔好再打電話嚟。」

10男致電搵「吳太」

昨日記者聯絡吳佩孚時，他表示正於將軍澳警署報警：「嗰個『吳太』電話係我嘅，係畀人整蠱、惡搞，我3點幾已經嚟報警，警方話會交畀上頭處理，不過有警察喺金馬倫道巡過，但唔見呢個『廣告』。」他又謂前晚已有朋友傳這張惡搞圖給他，亦承認曾有8至10個男子致電找「吳太」，他已禮貌地告知對方是被整蠱及已報警。

屢收性器官相片

問是否同人有「誤會」？吳佩孚說：「我冇得罪人，亦冇同任何人有金錢問題，我覺得呢張相係P圖，如果真係有呢張『廣告』擺喺街，點會只得一張相，係我太太被人針對，因為佢近嚟喺facebook被人性騷擾，Send埋啲性器官相，我太太已經冇理佢。（如有人再發放此虛假消息可會採取法律行動？）梗會啦，我已經同律師傾過。」

問其太太心情如何？他說：「梗係唔好啦，但佢會照出街，我會陪住佢。（太太會否剷晒Facebook啲相免被人盜用？）唔會，唔會斬腳趾避沙蟲，太太喺社交網啲相又唔淫穢，都係夏天着背心，又唔係着泳衣行嚟行去，我哋唔會退縮。（該廣告用詞太惡心？）梗係啦，係女性聽到都唔開心，同埋一睇就知惡搞，點會80蚊咁平同有免費體驗呀？」吳佩孚和太太結婚13年，育有一子一女，他聲稱太太婚前從事美容工作。

文：音樂組