蘇永康擬掟200萬谷囝囝入名校
三月榮升人父的蘇永康（阿公）一向愛子心切，雖然囝囝Jazz只得兩個月大，但阿公與老婆都未雨綢繆預先為囝囝報讀Playgroup，更打算豪擲200萬為囝囝鋪路，報讀即將開幕的英國名牌學校！不過，他自知對這方面不熟悉，所以決定請好友楊千嬅做指路明燈。
歌手蘇永康（阿公）於三月榮升人父，雖然囝囝Jazz只得兩個月大，但阿公已為Jazz入學讀書問題而煩惱，更自爆已經為囝囝報讀Playgroup。阿公表示大部分小朋友八至十個月大，就開始去讀Play Group，所以近日太太已經叫他開始着手報名，笑言現在才知道學費這麼貴，報讀程序又多麼複雜。
搵千嬅教路
他又直言會請教楊千嬅：「話有間就嚟開嘅英國學校，入場費要二百萬，嘩，真係貴到呢！我其實都唔係好識，所以等千嬅忙救完志明之後，我都想約佢出嚟問吓佢心得，請千嬅做指路明燈。」
另外，阿公前晚趁母親節於澳門舉行演唱會，獲太太、囝囝Jazz、外母及蘇媽媽前來捧場，所以阿公特別選唱張國榮的《追》送給太太及兒子。他透露原本想帶囝囝上台，可惜Jazz由開場一直喊到完場，所以連太太都要在後台湊仔，未能好好欣賞演唱會。愛子心切的阿公完騷後立即回到後台氹Jazz，坦言非常珍惜跟兒子相處的時間：「我都唔係後生做爸爸，唔想錯過佢成長嘅每一刻！」至於太太的第一個母親節，阿公因剛由加拿大回港，又要到澳門開騷，所以沒有時間挑選禮物，並搞笑說：「阿仔收利是收到最近仲收緊，人仔細細就咁有米，老婆應該攞佢啲利是去買禮物，當係阿仔送畀媽咪！」
文：音樂組