張建聲認戀陳嘉莉互捽撻着
藝人伍詠薇、陳婉衡及張建聲等昨晚出席電影煞科宴，近日與同公司女藝人兼崔建邦舊愛陳嘉莉傳緋聞的張建聲終承認戀情，透露已拍拖個多月：「我哋好啱傾，鍾意糟質自己，我又增磅又減磅，佢就打拳搞到成身傷，我哋開始係因為互捽瘀傷！（有肌膚之親喎！）我都知快咗啲。（之前你情緒有問題，佢支持你？）係！當時醫生都叫我搵人傾偈，點知咁啱傾。」
伍詠薇兩年多前與無綫「不歡而散」，近日決定食回頭草，接拍無綫網劇《飛虎極戰》，她大讚劇本吸引，問到可擔心拍攝辛苦？她說：「根本唔知咩叫辛苦，電視出身嘛。」她又將演出概念真人騷：「我自己度橋，我咁多經歷，相信表演會好有趣。（奇妙電視用《伍姑娘真識食》開台喎！）拍嘅時候唔知咁受重視，好榮幸，蔡一傑喺節目內自爆曾有個拍拖18年嘅女友，我都係第一次聽，有少少呷醋。」而穿緊身白衫的陳婉衡透露拍戲期間，要色誘演員肥腸：「當時着露腰裝同短褲，所以唔敢亂食嘢。過幾日我會去個生日旅行，同班女朋友去泰國，會帶好多泳衣去，相信嚟緊會見到我好多新相。」