Jessica撐Yanny取消關注Heidi

Super Girls成員Heidi與Yanny，日前被本報率先爆因先後與有米音樂監製陳考威（Gareth）拍拖而擘面。除了Heidi在社交網取消關注Yanny外，向來與Yanny最老友的Jessica，亦被發現與Heidi及與Heidi最熟的Aka互相取消關注，似乎已由兩位成員不和演變成兩派內訌，當中只有Cheronna保持中立，被封親善大使。Yanny、Jessica與Cheronna昨日出席時裝活動，剛巧Heidi及Aka都未有現身，令組合分裂一事更加似層層！

曾嗌大交

受訪時，她們解釋三缺二現身全因品牌安排了Heidi與Aka負責下月的宣傳，堅稱並非不和。問到Jessica與Heidi及Aka互相取消關注，Jessica坦言因一年多前曾經嗌大交：「其實都係網民講我先記得呢件事，嗌交原因好無聊，係為咗請人食咩菜而嗌交，但好快冇事。冇follow番因為尷尬，好似好瘀咁，但我覺得有冇follow唔係咁大件事，我識打佢哋個名，都會睇佢哋啲嘢同留言。」問到Heidi是否與時裝店高層拍拖？三女均表示不知情：「我哋有時會問大家有冇拍拖，可能因為佢着好多時裝，就話佢同時裝店老闆一齊。」

Heidi與Aka在隊中最Friend。

SG三缺二出活動，堅稱冇不和。

避談男友

而Yanny早前與男友Gareth到美國旅行，問到是否已見對方家長？Yanny拖其他成員落水，表示大家都見過Gareth的家人：「因為我哋之前成日玩，佢妹妹都同我哋好friend，我哋又會上佢屋企打邊爐。（以女友身份見？）都有嘅。（男友好撐你喎。）多謝晒。」講到男友，她明顯變得寡言，Jessica即為她解圍說：「佢好怕講感情事，係好怕肉麻嘅人，一講到呢啲就會放空。」

文：音樂組

攝：鄭家俊