林敏驄鵪鶉情聖變散戶

出口成詩經典情歌

八十年代開始，佢填過千首情歌畀天王天后唱，文字威力，入心入肺，仲化腐朽為神奇。譚詠麟嘅《愛的根源》：「隕石旁的天際，是我的家園」，原來係由once upon a time衍生出嚟！梅艷芳嘅《夢伴》：「煤氣燈不禁映照街裏一對蚯蚓」，查實咪就係話緊一對慾蟲囉！為關淑怡填嘅《梵音》，盡顯詞風超凡脫俗：「慾望就是一種虛空的苦痛，由它虛空」。少年得志嘅佢，真係齋食版稅都夠，嚟緊仲喺紅館大搞入行三十五年嘅紀念作品展，難怪佢寸嘴話：「喺填詞界五年，已經寫晒人哋一世寫唔到嘅嘢啦。」

恃才傲物，語無倫次，甚至出口傷人，負評多到一卷廁紙都寫唔晒，林敏驄平時玩人就膽生毛轉數快，唯獨對女就鵪鶉笠水冇貨派！英雄難過美人關，填詞填到識飛都好，點會逃得過「電眼美人」李美鳳雙勾魂電眼呀！

聽講佢當年愛李美鳳嘅程度，唔少得過「七愛」吳千語嘅林峯。1990年林敏驄同李美鳳拍戲撻着，愛到同年去埋加拿大玩秘婚，但係李美鳳唔想畀人知，林敏驄焗做隱形老公。有次被傳媒撞正去醫院探病，佢哋即扮唔識彈開，超鬼祟。為幫李美鳳圓歌星夢，林敏驄親自操刀填詞，你唔需要知李美鳳唱成點，齋睇首首歌名唔係叫《深愛您》就係《全部愛全為您》等，已經搞到你真係無心睡眠。可惜點肉麻骨痹，婚姻得五年貨仔，李美鳳好快嫁埋畀台灣富商做少奶奶！

旺妻命「心都噏」

「愛是一發不可收，你是可愛到永遠，我是真心捨不得你走。」聽講李美鳳改嫁後，林敏驄好頹無心填詞，仲每日唸經打坐睇佛經，「心噏」咗兩年，又畀佢遇上落選港姐陳伶俐兼奉子成婚！結婚十年，突然傳出陳伶俐疑有外遇，林敏驄全程挺身護妻，做晒大龍鳳拖晒手去見「小三」以證太太清白，奈何最後佢親自宣布離婚，而且仲贏風度拎尾彩咁話：「我照出嚟撐，係男人起碼要有嘅風度，我認識佢唔係咁嘅人，分開咗仲係好朋友，呢個係我承諾。」自此林敏驄冇再玩真愛，而陳伶俐亦改嫁新加坡富商。

自嘲有條旺妻命嘅林敏驄，兩段婚姻令佢歷經男人最痛，但從來冇出嚟狂數爆大鑊，只係默默啞忍承受，係對兩位舊愛最情深嘅尊重！佢筆下所填嘅杜麗莎《假如》百分百係佢對舊愛嘅寫照：「假如，真的要說分手，請求， 把我愉快記憶都洗去，才能免我一生也在默默痛苦」。情路跌蕩大半生，經歷過兩段刻骨銘心嘅愛情，身插兩把癡心情長劍，乜都夠啦！與其長揸，倒不如做愛情散戶遊戲人間，仲要好似佢首《狗向西奔走》一樣轉食西洋菜，得閒同西洋菜花前月下，一齊天邊海邊一顆小星星咁數仲過癮！

Nuts哥