高海寧「撒破郎」嗲功登頂三招冧仔
身材火辣的「無綫咪神」高海寧（高Ling）在無綫熱播劇中擅於以心計攻陷獵物，外號「撒破郎」！但她笑言本身性格似冰山，惟今次拍攝令她撒嬌功力大增，兼且更有媚態及電力，高Ling開心Share幾招冧仔招，即使唔使扮BB聲一樣令另一半甜在心。
由宣萱、林文龍、唐詩詠、王浩信及高海寧主演的無綫4K劇《不懂撒嬌的女人》播出以來相當受歡迎，除了「撒嬌」這個話題夠Hit，一眾角色性格更猶如職場眾生相，當中由高Ling飾演的內地女子田蜜外號「撒破郎」，有別於台妹的嗲聲嗲氣，她為向上爬不擇手段，以心計俘虜男人心，堪稱更高層次的嗲功！
學挑逗硬晒軚
身為「無綫咪神」元祖的高Ling身材火辣，單睇外形已是大批男士的夢中情人，但她接受本報專訪時自認男仔頭，直言田蜜這角色非常難演，更發現原來自己欠缺女性媚態一面，笑言今次是重新學做女人：「田蜜講嘢好淡定，永遠保持微笑，學宣萱話齋係陰濕，同我真實性格相反，我要戒晒所有郁身郁勢嘅小動作！有場戲我要從後攬住林文龍，又要用手指喺佢心口打圈，我以為好易啦！但做咗好多Take都好硬，要女導演示範畀我睇，係咁叫我軟啲、挑逗啲。」問到有否找緋聞男友音樂人鄧智偉試嗲功？高Ling笑說：「就係冇！所以先咁硬！以前啲男友都埋怨過我似冰山，咩都自己做晒，唔夠倚賴佢，經過呢套劇之後，我都學到運用眼神、媚態呢啲嗲功，將來必要時候會用得着！」
「撒嬌功力」幾級跳的高Ling表示雖然不愛扮BB聲，但一樣有三招窩心冧仔招，包括「煮幾味」、「識收聲」及「咪咁Chur」，她說：「個男人辛苦返到屋企，發現老婆已經整好餐飯，係好冧，又或者生日自己整蛋糕，男士會好心甜！第二樣就係善解人意，唔好喺對方好攰嘅時間要求太多講嘢，要喺適當時間做適當嘅嘢！第三樣就係信任對方，唔好成日Check住電話，成日叫佢報到，有時男仔有男仔活動，唔好一直煩住佢，畀對方空間，男仔係會感受到會好感激，喺男仔Friend面前會好有面子，女朋友唔係無理取鬧。」
攻心計哭訴「性騷擾」
此外，《不》劇劇情愈來愈精彩，今晚高Ling繼續攻心計，繼成為林偉私人助理後，她開始用計向林文龍埋身，撒嬌要求他陪自己吃蛋糕洩憤，更獻吻答謝對方，並耍嗲功表示會暗中協助他。到了明晚第14集，高Ling向林文龍哭訴被公司同事性騷擾，令全劇最好色的「賤Han」黎諾懿成最大嫌疑犯！
至於宣萱與林文龍感情轇轕糾纏不清，到明晚再有高潮位，宣萱拿出林文龍的M字鑰匙扣，問他當年為何突然來電，他表示當時遇車禍，以為自己會死，那一刻才發現宣萱是一生最愛，但宣萱表示已對他失去信心，林文龍從後攬住宣萱殺出一句：「請你管住我！」究竟能否軟化宣萱呢？
文：影視組