Oscar寫「包」單 餵飽江若琳
公開認戀江若琳（Elanne）的前組合Bliss成員、現為「生煎包王」蕭潤邦（Oscar），捱足七年變出七間食肆，更成功將Elanne私有化，愛情事業「喜雙飛」，前日黃雨警告下Oscar於大埔新店首天試業，廚房、樓面、拉客一腳踢，努力儲老婆本：「等大眼妹日日有飯開，日日有包食，唔會餓親佢！」
早前Elanne和Oscar在網上高調認愛，十年友情升格愛情，而轉戰飲食界的Oscar生意愈撈愈掂，已擁有六間生煎包店及西餐廳，近日更增設至第七間，「生煎包」進駐大埔，前日他落新舖巡視，見他落手落腳同包點師傅在廚房團團轉，又蹲在店前整理門面，由外賣打包到派傳單都親力親為，更主動同街坊搭訕，相當賣力。
穩定啲先娶老婆
談到其愛情事業兩得意，Oscar笑言：「生煎包同小籠包囉！打孖嚟。」原來新店是首天試業，卻撞正黃雨，他說：「係呀，腳都震埋，出門口時黃雨，真係驚有影響，但我細佬話生意唔錯，所以都有信心。」靠新舖食胡「娶老婆」？Oscar即說：「靠呢間娶唔到，要靠多少少，今年都想開多兩、三間店，開多啲生活穩定啲。」新舖Elanne可有份投資？他說：「梗係冇，做生意唔好搞到咁複雜。（對呢段情冇信心？）梗係有，但自己做到，就唔想因為拍拖而賣弄大眼妹（Elanne）嘛，我做好我嘅生煎包，佢就唱歌拍戲，我哋一齊努力，我同佢講，你唔使驚，日日有飯開，日日有包食，唔會餓親。」
免費包惠及長者
記者笑他成功「生擒」Elanne做女友，Oscar即害羞說：「唔講，唔知畀咩表情，好尷尬，咁係個天安排，唔關生唔生擒，一路都係朋友，有時你覺得去到某啲位就變男女朋友，係自然嘅！（你主動？）咁梗係啦，人哋女仔嘛。」又說開新店女友比他還緊張，預計6月前會擇吉日開張，Elanne屆時會現身撐場。訪問期間Oscar不忘同街坊寒暄打關係，他說不做只會賺錢的生意人，大埔有很多老街坊，他想給長者派「免費包」，現正構思中。
文：音樂組
攝：司徒國榮