阿倫抵諗啲錫錫女粉絲
【戴穎怡深圳寶安區直擊】譚詠麟近日忙於籌備與歌神許冠傑8月的紅館騷，昨日他出席活動時，自爆要求屆時必定要保留錫歌迷環節，更抵死表示錫女歌迷這些粗重工夫由他一力承擔！
歌手譚詠麟（阿倫）、鍾鎮濤（阿B）、彭健新、容祖兒及區瑞強等，昨日應邀到深圳寶安區出席動土儀式。提到阿倫將於8月與歌神許冠傑（Sam）假紅館開騷，阿倫承認揀歌方面有困難，但笑指有一個過往Sam個唱上的項目必定會保留：「佢錫歌迷嗰Part一定留喺度，但Sam就錫番啲男歌迷，女呢啲粗重嘢就畀我嚟做。」問到可怕有人呷醋？他說：「唔會，開明嘅。」
阿B笑謂若有錫歌迷環節，自己亦想做嘉賓：「我如果做嘉賓就可以選擇性去錫。」提到填詞人林敏驄大爆阿B曾向他投訴，指他寫給阿倫的歌詞比較好，阿倫笑說：「佢諗多咗咋？佢唔係隻隻歌都咁好嘅咩？（佢話係鋤強扶弱，阿B喺溫拿成日恰你。）佢亂噏嘢，我哋自己都唔覺，佢係咪宣傳自己個演唱會。」
祖兒不覺愛得遲
同場的祖兒近日與母親等長輩組師奶團遊日本，好姊妹蔡卓妍（阿Sa）其後亦到當地同行。她笑言阿Sa在兩日的旅程中喪食：「食完晚餐已經好飽，佢消夜再食多盤壽司，我問佢係咪唔識飽！」笑指終於見識到對方的「真功夫」！祖兒續透露有意挑戰獨遊：「唔使太多計劃、隨心而行嗰種，未諗去邊。」
提到她看完電影《29+1》後在社交網有感而發，祝願大家找到自己的方向，不用走太多冤枉路，祖兒說：「年輕時候太多選擇喇，我就冇選擇嘅，公司嗰時有推我行，回想番都要多謝公司，依家推我，我都未必行到，要細個先有咁嘅魄力，加上佢哋嘅推動力，互相配合。」文中她亦提到不要愛得太遲，她指現實生活中自己早已明白這道理，至於愛情並不是自己能控制：「愛情係兩個人嘅事，我唔覺自己遲，唔遲唔早，時間啱啱好！」