張振朗粗又鞋陳瀅驚佢條毛
藝人張兆輝早前被女粉絲「撩上床」，笑言多得從事美容行業的太太為他打造完美膚質。陳瀅則繼續爆張振朗料，嫌棄這位劇中男友腳毛太多，又粗又「鞋」，搞到張振朗笑說：「咩都畀你睇晒！」
藝人張兆輝、張振朗、陳瀅、王卓淇及何啟南等昨晚齊集尖沙咀一間火鍋店，收睇主演劇集《全職沒女》大結局，場面熱鬧。近日被女粉絲私信「撩上床」的張兆輝被問到飛來艷福有何感受？他笑說：「冇諗過咁多粉絲鍾意莊富豪（角色名），但我係張兆輝囉！（太太呷醋？）佢只係話我好好彩，仲有咁多人鍾意。咁我都好多謝太太，幫我塑造到皮膚膚質咁好，佢當然話仲有進步空間啦！」他又指今次拍劇，台前幕後合作相當愉快：「好多觀眾話唔捨得，叫我哋開續集，呢啲要交畀公司、監製等，再拍都唔出奇嘅，到時盡量度期。」
踢爆腋下光脫脫
至於劇中扮演一對的張振朗與陳瀅公然「耍花搶」，繼爆對方愛當眾換衫後，陳瀅再爆張振朗秘密：「佢好多腳毛，但又冇乜腋毛喎！試過有場戲講我哋互翹雙腳，但佢太多毛嚇親我，真係好粗、好『鞋』！大家離行離列咁，導演當然唔收貨啦！不過佢冇乜腋下毛，所以冇異味。（唔鍾意男人多腳毛？）咁我寧願多腳毛好過多腋下毛。」張振朗即笑說：「好似咩部位都畀你睇晒咁！」
睇番床照嚇一跳
談到兩人的「床照」，陳瀅笑言睇到報道時嚇一嚇：「以為自己真係露半球，好彩原來係你（張振朗）啫！」張振朗則說：「我行緊性感路線！喺戲入面好多裸露鏡頭，但相信觀眾比較喜歡睇陳瀅囉！」由於兩人結伴到場，陳瀅透露途中聽到張振朗講電話，對方表示「幾多錢都畀你」，張振朗即澄清：「經你把口真係乜都歪曲晒！其實係位Auntie誠邀我出席佢囡囡嘅婚宴，話會畀封大利是我咋。」
文：影視組