邵仲衡惡鬥冤 條脷打晒結
藝人邵仲衡日前到彩虹舊區拍攝ViuTV靈異劇，飾演茅山師傅的他Chok爆收服冤靈，一度險被對方的剃刀刮到！談到劇情有關靈異事件，他坦言「Feel到有啲唔同」，但暫時拍攝順利，未有可怕事發生！
邵仲衡在ViuTV靈異劇《詭探》中飾演性格古怪的茅山師傅，日前他與劇中手下駱振偉到彩虹舊區拍外景，劇情講述他在舊式理髮店對付冤靈，對方出動剃刀招招攞命，剃刀更險刮到他，但都被他一一避開！
「Feel到有啲唔同」
他表示劇集有關一些都市傳說，每日睇劇本似睇小說，最難是要讀極長的茅山術語：「條脷打晒結咁，講足半分鐘文言文，撻番着以前拍古裝啲記憶。（有冇遇到靈異事件？）我相信存在嘅，係夾腦電波咁，我係科學嘅人，都感覺到有啲唔同，但拍攝好順利，天陰極都唔落雨，現場都有師傅睇住，安全嘅。（動作戲呢？）冇問題，應付到。」問到日以繼夜開工，太太有否詐型？他笑說：「佢都忙，成日要公幹，我都抖咗咁耐，係呢年比較忙，諒解吓啦！（見得好少？）少咗，但OK啦，老夫老妻！」
飾演古惑仔的駱振偉則靠吹水協助邵仲衡，較少埋牙肉搏，談到最難忘的場口，他笑說：「茅山師傅可以用身體吸起汽水樽，我練極都練唔到，佢就打我，加埋NG，打咗好多次！」而負責動作設計的羅天池則表示，跟平日打泰拳完全不同：「要配合茅山師傅點捉鬼，再用鏡頭拍出感覺，唔使度咁多花招，每一下都有力，有Mood啲！」
楊思琦教性知識
此外，邵仲衡昨日與楊思琦為同一劇集拍外景，飾演心理醫生的思琦透露，現實中負責解答囡囡的問題，問到囡囡可有問她性知識？她笑說：「咪話佢喺媽媽肚入面生出嚟，都有教佢游水要着好泳衣，除咗媽媽同婆婆外，唔可以畀陌生人掂你身體！」
文：影視組
攝：林蔚恩