王曼喜手機藏「藝術照」無懼外洩

名模馬詩慧（Janet）、大女王曼喜（Kayla）、前港姐周嘉玲、名模Ana R.、名人鄧永鏘女兒鄧愛嘉等，昨日一同出席品牌活動。提到Kayla在Instagram上載背部全裸出浴照，Janet即出言護愛女：「背脊啫！（令網民有幻想？）着晒衫都可以有幻想！」

馬詩慧撐囡囡

在旁的Kayla表示不明大家為何有此想法：「唔明點解大家有咁嘅反應？其實成個感覺好健康，大家畀人灌輸咗個概念，可以轉個角度睇。我都有問媽咪，覺得構圖好靚。（有冇底線？）一定有，覺得適合先會post出嚟。」問到會否挑戰全裸？Janet笑說：「呢個咪全裸囉！」記者指正面全裸，Kayla坦言不會：「我唔當自己係model，唔會行呢方面。（收藏更激嘅相？）我自己鍾意影相，以藝術方面嘅角度，有同冇都好難講。（唔怕跌手機外洩？）我有諗過，但都幾安全嘅。」問到誰為她拍下這張「藝術照」？她表示：「朋友，之前成班女仔去美國旅行，大家幫大家影玩吓。」她還透露媽咪Janet曾拍攝性感大肚相。

馬詩慧力撐囡囡，大讚出浴照構圖靚。	放大圖片	鄧愛嘉孖老公出席，表示不知BB性別，想保留驚喜。

鄧愛嘉下月生

而鄧愛嘉（Victoria）在老公Christopher Owen陪同下出席，是懷孕後首次開腔提及BB情況，透露下月預產期，問到心情如何？她說：「心情當然興奮啦！（男定女？）暫時未知，叫醫生唔好講，想有驚喜！（想男定女？）冇所謂，最重要健康。」她透露爸爸鄧永鏘將榮升外公，心情同樣興奮，問到中文名是否由爸爸改？她說：「佢話留番畀細嘅決定。」她表示希望自然分娩，體重方面冇刻意磅，但一直有做運動，笑言屆時有力生B。

文：名人組