陳瀅揭張振朗底牌：佢係露體狂！
女神陳瀅昨日宣傳新劇時變身姣神，伸手除張振朗的衫之餘，又爆對方着超窄底褲愛露體，張振朗即面紅反擊指陳瀅有心偷睇！
無綫熱播劇《全職沒女》下周進入結局篇，張兆輝、陳瀅及張振朗等演員昨日到油塘為劇集造勢。以白色吊帶背心襯牛仔褲、一身女神Look現身的陳瀅，玩遊戲應要求即場姣張振朗，還伸手除對方的Tee，令他露出少許「孖煙囪」，陳瀅還爆料：「拍劇嗰時佢成日喺女工作人員面前換衫換褲，但又唔用布簾，見過佢底底！好緊嗰種，懷疑佢係露體狂。」
面紅反擊：佢偷睇就真
事後，張振朗面紅解釋着超窄底有大條道理：「咁至唔會走光呀！（唔拉布簾？）趕時間，我喺屋企都係咁，我當TVB係我屋企。（你係露體狂？）我懷疑係陳瀅偷睇我就真！（緋聞女友陳芷尤睇過你換衫？）好多同事都睇過，睇吓佢好唔好彩啦！」
至於張兆輝被問到劇中的難忘情節，他說：「同張達倫有場戲，講我盡吐心聲，監製都話精彩。（同陳庭欣裸背戲比，邊個難啲？）各有唔同難處！佢雖然裸背，都有嘢遮。（太太同女兒晚晚捧場？）有！個女鍾意睇我喺電視出現。（佢想入娛圈？）作為父親唔會限制，大前提要讀好書先。」對於曾守明猝逝，輝哥感觸說：「同佢識咗好耐，希望佢喺另一個世界過得開心。（曾太有冇嘢要幫手？）同佢唔熟，但有同監製講，盡量幫忙。」
文：影視組