謝婷婷鑽石盛女愈食愈西

貴為鑽石級盛女嘅婷婷門檻太高，敢高攀接貨嘅男人太少，所以婷婷就算「當打、有態、有身材」，都嫁杏無期，只可以拍住拖先，情況就好似只係細婷婷兩、三年嘅四哥女友Coco咁囉，個男友唔想結婚，唔通一巴打佢埋牆咩？係都等Joe Junior出院先啦，冇人揸咪呀，老四！

正所謂「有頭髮，邊個想做瘌痢？」、「有得嫁，邊個想攝灶罅？」都係婷婷EQ高，(手禁)得住自己道火，唔似得佢老竇81歲人仲成日喊打喊殺，溫文有禮嘅婷婷絕對唔會公開爆粗，大庭廣眾Fxxk You、Fxxk You，貪好睇咩！睇吓佢早排回應四哥被驚傳再做老竇嘅一次示範：「我打畀爹哋問，終於感受到記者平時點畀佢鬧。（佢話一巴打你埋牆？）爭啲，所以我只講Love You就收線。」甚有當年馮淬帆「金山橙你個沙田柚」嗰招化粗口為生果嘅精髓，仲要講完收線，真係骰寶開出三條一之「你冇得再小」！

鬼佬易話為

婷婷作為一個目睹老竇謝賢、阿媽狄波拉、阿哥謝霆鋒都係離婚收場嘅過來人，婚姻有幾莊嚴而有約束力，佢心中有數，婚就算要結都係遲結好過早結，免得雙方多咗時間去反悔，何況謝賢都話準備咗已經擺咗N年嘅鮑魚畀婷婷做嫁妝，塵封鮑魚？有冇腰心腰肺添呀？可以畀埋腰膶我喎！

婷婷唔只吸取咗父母、阿哥嘅離婚教訓，仲喺佢哋身上悟出搵男人要「一路向西」嘅道理！事關唔係人人好似自己阿爸阿媽咁，離咗婚都可以三日唔埋兩日帶埋各自嘅新歡出嚟飲飲食食，但唐人倫理觀念深啫，鬼佬易話為得多，唔理兄定弟，一律brother，唔理表定堂兄弟姊妹，一概cousin，如果婷婷唔「一路向西」嘅話，佢擇偶只能揀台灣藝人小豬羅志祥，因為小豬話：「不用分那麼細，我們都是中國人」，所以你話婷婷係咪好應該愈食愈西？

三唔識七最穩陣

若果婷婷好似佢阿哥霆鋒咁不假外求，效法佢植根香港，同天后王菲、影后張栢芝，仲有趙學而、盧巧音、戴辛尉等談情說愛，到時唔係「十二道鋒味」，係「六度分隔理論」，即係指世上兩個唔相識嘅人，佢哋之間只需要5至6個朋友、同事、同學、親戚，就可以藤(手能)瓜，瓜(手能)藤咁扯上關係，咁你話，婷婷要搵個有頭有面嘅男友，又要佢同阿爸、阿媽、阿哥、前阿嫂、前哎吔阿嫂全無關係，最灑脫嘅做法係咪「一路向西」先？

所以婷婷繼打碟DJ Drafus、動作演員安志杰、名媛之子戴尚安等ABC或半唐番後，直頭唔鬼唔食，呢期就同荷里活影星「鷹眼」謝洛美維拿（Jeremy Renner）發展得唔錯，仲講明唔介意另一半有仔女，的確smart！首先謝賢都話唔識邊個鷹眼，其次鷹眼前妻Sonni Pacheco，霆鋒都應該唔識啦啩！至於鷹眼啲舊情人，據講都同霆鋒取向好唔同，Clear！

不過婷婷千祈唔好心軟，走去介紹鷹眼畀老竇認識，事關憑西片《拆彈雄心》彈起嘅Jeremy，如果知道謝賢絕技唔只識chok蕉，仲可以徒手爆開合桃，佢唔走頭就有鬼，婷婷唔生小朋友都得啫，Jeremy唔想變拆「蛋」雄心呀！

Nuts哥