袁偉豪撐拖手認愛抵讚
藝人袁偉豪昨日為化妝品品牌拍宣傳片，對於何雁詩與鄭俊弘被影到才認拍拖，他說：「唔好咁講，都需要嘅，有睇到佢哋拖手相，覺得值得讚許，既然都知道，大方。（做番有承擔？）係，幾好，希望搵到佢哋想要嘅嘢，快樂。」提到他與岑杏賢拍拖分手都公開認，他表示做幕前生活被放大，不介意分享。問到再拍拖會否公開？他說：「睇情況。我不嬲都唔會講大話，暫時拍拖未係時候，專注工作。」
而藝人莊思明前晚表示戥他們高興：「藝人公開戀情係需要勇氣，祝福佢哋。（講大話唔啱？）應該講定唔應該講嘅階段令人混淆，相信佢哋會處理得好。」她稱自己亦是被影到才公開，與男友楊明有共識，揚言公開戀情有壓力。
另外，昨日又傳出2015年何雁詩曾在藝人張曦雯手上，成功搶到其男友Wataru，並發展為情侶。記者聯絡張曦雯，她說：「真係冇啲咁嘅事，但係唔想再回應，因為唔想愈描愈黑。（曾與Wataru拍過拖？）我哋冇拍過拖。」