譚詠麟撩巴治奧意大利賣雲吞
樂壇校長譚詠麟（阿倫）鍾情球類活動，早年熱愛高爾夫球，可惜頸椎問題停打六年，昨日他為慈善再度出手晒球技。而日前與意大利球星巴治奧緣慳一面的阿倫，知對方愛食雲吞麵，即笑言要斟他一齊於意國開舖。
阿倫昨日出席「瑞銀香港高爾夫球公開賽慈善盃」，擔任活動大使主持開球禮，他擺出打高球的拗腰標準姿勢來發球。原來阿倫已經有六年沒有打高球，他說：「之前扭傷頸椎後，已經冇乜打，最多只可以打3、4個窿，打得太多會扯住條頸，今日自己就頭4個窿打Par（標準桿），但如果再打多幾個窿就唔係Par，變咗趴地個趴。」
沒有打高爾夫球後，阿倫轉玩踢波，但又告受傷，他表示之前隻腳被兩度踩傷：「所以呢排做騷係有史以來最辛苦，因為企足兩個鐘隻腳就開始腫，一個騷至少兩、三個個鐘，所以好辛苦。」等痊愈再做運動？阿倫說：「我邊忍到咁耐，尋晚先去踢完波，我一復出就連入3球。（大家都避開畀你射？）好似紅海散開咁，勢如破冰……船！」
「佢鍾意水餃嘅味」
提到意大利前球星巴治奧日前來港，並專程到其開設的雲吞麵店捧場，阿倫興奮地說：「因為嗰日我喺內地，克勤就做緊嘢，所以我吩咐間店嘅經理要好好招待佢，原來佢上次有嚟食過，可能佢係意大利人好鍾意食麵，上次佢有試過雲吞麵，今次就專登叫經理沖杯港式奶茶同靚嘅雲吞麵，佢又鍾意水餃嘅味道。」既然意國人喜歡食麵，不如在當地開分店？阿倫笑說：「好喎，同佢（巴治奧）斟下，到時開間『左麟右李中間巴』都得喎！」
文：音樂組
攝：司徒國榮