Supper Moment自爆洗廁歲月
前晚樂隊Supper Moment（SM）於會展舉行一連兩場的「溫柔革命十周年演唱會」，全場8,000歌迷反應熱烈，主音Sunny自爆與隊友CK在青年中心洗廁所的歲月，難得苦中「作樂」，艱苦十年，終於捱出頭。
Supper Moment演唱會前晚在會展開鑼，吸引蔡一智夫婦、吳業坤、胡鴻鈞、林奕匡和林盛斌（Bob）捧場，SM開場唱出《飛》，觀眾已忍不住企起身拍手叫和，主音Sunny亦High爆在台邊的喇叭箱跳上跳落，到中段時，他又突然跳落台繞場一周，Fans一擁而上握手拍照，他笑說：「用一首歌時間行一個圈唔易，唔好以為我成日冷待280（指票價）同180嘅觀眾。」
大讚尖子級歌迷
當唱完同名作《Supper Moment》後，Sunny自言沒想過能在會展開騷，並有感而發大談當年樂隊發迹前的苦況：「十年前我同CK仲喺青年中心洗廁所，我唔係貶低洗廁所嘅工作，而係洗廁所真係令人學到嘢，寫咗好多歌。」CK插嘴笑說：「咪寫咗啲屎坑歌囉！」Sunny說：「我係隊中最易迷失嘅人，唔係你哋諗到咁堅強，我將鬱結寫晒落啲歌度。每次我迷失，你哋唔知點解喺fb inbox話，聽完我哋啲歌後會決定去非洲考古，又話我哋啲歌好似瀨尿牛丸咁，聽完成績都好啲，真係好想多謝你哋。」又讚觀眾全是「尖子級歌迷」。
追憶已故經理人
此外，台上播出今年7月病逝的經理人Gary Chan與他們的舊片段，之後SM唱出《最後晚餐》，配合螢幕上Gary的肖像畫慢慢消失，Sunny終忍不住邊唱邊流淚，觀眾則開着手機燈變成一片星海，場面感動。SM首場演唱會結束後，樂迷熱情未減，紛紛在網上Post相及留言瘋狂式「洗版」。
文：音樂組
攝：張福宏