預測濱崎步又嫁老外 紀香再婚有危機
堪輿學家麥玲玲宣布與日本占星術師薰子合作，強勢攻入日本玄學市場，被日本人封為香港女仙的她坦言為攻日做好準備，麥玲玲更為日本兩大紅星濱崎步及藤原紀香預測婚姻運程，直指濱崎步很大機會再嫁外國人，至於再度成為人妻的紀香則於6至7年後會有婚姻危機。
堪輿學家麥玲玲、日本占星術師薰子及「日本通」王友良昨日現身發布會，宣布麥玲玲將會與薰子合作打入日本市場。麥玲玲說：「其實年幾前王友良叫我去日本試吓，拎咗我本玄學書去日本，搵咗薰子老師同我合作，王友良做咗我日本代理人咁。我同薰子傾過幾次電話後約出嚟，咁就合作啦。（互相算吓旺唔旺對方？）大家都好夾呀。」
日本推出玄學App
麥玲玲表示將會在日本推出玄學App，幫日本少女睇戀愛運程。她說：「係畀少女睇戀愛運，我仲畀日本人封咗叫『香港女仙』（意指女性仙人）。」本身在香港及內地發展玄學事業的她，如今又賺日圓，被指收入和味，她笑說：「試吓唔同地方嘛。（你同員工夾錢買樓？）幫個女仔（員工）畀首期，依家同佢業權一人一半！」她大呻難請人，故要好好對待員工。
兩位大師即場分析幾位香港女藝人的運程，對於麥明詩與林作離合，麥玲玲坦言：「可能連佢自己都唔知。佢今年係離離合合，會易入三角關係之中，出年會清楚少少。」至於蘇麗珊與游學修近期分手，薰子表示：「佢係一個自信心好強嘅人，出年會同一個好有錢嘅人拍拖。」
花10幾萬置裝
事後麥玲玲接受電話訪問，再為兩位日本天后級藝人分析運程。近日濱崎步與美籍老公Tyson三年婚姻玩完，麥玲玲說：「佢未來都會有桃花，但都係適合同外國人拍拖，對方一係大佢20至30年，一係細佢10年。」至於上月第二度做人妻、下嫁歌舞伎演員片岡愛之助的藤原紀香，麥玲玲說：「應該呢個係佢最後一個，不過佢婚後6至7年會有波折，如果嗰陣聚少離多就可以化解。」她又透露為攻日花6位數字置裝：「着得好睇少少點都要10幾萬，同埋我會喺個邊請化妝師，日本化妝品高超啲嘛。」
另外，王友良於電話中指麥玲玲會與薰子在日本酒店舉行玄學講座，需購票入場，可即場問兩位大師運程：「玲玲師傅雞年運程會喺網上推出日文版，連埋個戀愛App，都投資咗成7位數字。」
文：專案組