胡定欣避埋身陳展鵬：係我問題！
緋聞情侶陳展鵬與胡定欣到尖沙咀出席美容產品活動時相當避忌，不願一齊受訪及拍照，定欣訪問後還被助手拉走，搞到展鵬一臉尷尬。當被恭喜有愛情滋潤時，定欣說：「恭喜我？唔會啦！（發展成點？）日日開工，冇任何進展。（唔一齊做訪問？）唔係！大會安排，我冇所謂。（展鵬有冇車你？）去外景！荒山野嶺都會車埋！（加分？）佢係好Gentleman。（試吓發展？）暫時戲裏面。」
至於展鵬被問到與定欣避合照？他坦言不知發生何事：「可能呢排影得太多。（訪問都唔一齊做？）唔知！係咪驚我講錯嘢？（感情升溫？）都係咁，好拍檔！（有冇機會發展？）定欣係好好，係我自己問題，可能我有怪癖啦！總之依家保持住好同事、拍檔關係，有感情當然可以發展，合約都冇寫話唔得。」
同場的佘詩曼參加內地真人騷節做女廚神，又透露有節目邀請幫屋企重新裝修：「不過想屋企有啲私隱，唔想做！（酬勞好呢？）睇吓係咪抵擋唔到嘅價錢！」最近洪永城與傅嘉莉拍床戲，女友唐詩詠則預告與王浩信將拍攝超激戲份：「大家都明做乜，但講聲好啲。」有啲火藥味喎！
