陳瀅爆男友猷亨網球水皮

宅男女神陳瀅穿着迷你裙出席網球活動,透露父母認為打網球夠優雅,所以從小就培養她,又踢爆男友賭王何鴻燊四房兒子何猷亨不懂打網球,相反賭王球技超凡,看來猷亨要向父親多多請教,才能陪女友切磋!

昨日陳瀅(Jeannie)、藝人林盛斌(Bob)及區永權等,一同出席「Let's Serve保誠社區網球普及計劃」啟動活動。Jeannie以迷你網球裙上陣,大晒白滑美腿,更即場與區永權及兩名小朋友對打,球技有板有眼。

她自言從小父母就要她學打網球、高爾夫球及游泳:「佢覺得打網球好優雅,以前每次暑假返香港冇做,都會去學。」問到有否跟男友何猷亨打網球?她說:「據我所知佢唔識。(佢爸爸賭王網球好叻,你知唔知?)係。(同男友平時鍾意一齊做咩運動?)我唔講啦,唔想講太多感情事。(男友畀壓力你唔好講?)係我自己想低調,唔想講感情事,想以工作為先。」她又謂沒見過男友弟弟猷君的新女友。

Bob最叻生女運動
至於同場的Bob透露8歲女兒因在電視上看到網球運動員很漂亮,所以要求學打網球做美女,他笑言:「我都好贊成,因為打網球受傷機會少,我自己就唔係好識打。(你最叻咩運動?)生仔生女運動。」提到囡囡很貪靚,Bob即大叫救命:「佢依家要扮公主,又玩化妝、搽指甲油。有次返屋企見到家姐用顏料幫阿妹搽指甲同腳甲,真係暈低!」在旁的區永權就笑謂自己兩個兒子可跟Bob的女兒一起對打網球!

文:名人組